കോഴിക്കോട്: കരിപ്പൂര്‍ അന്താരാഷ്ട്ര വിമാനത്താവളത്തെ ഗൂഢാലോചനയിലൂടെ അട്ടിമറിക്കുന്ന നടപടിക്കെതിരേ കേരള സര്‍ക്കാര്‍ മൗനം പാലിക്കുന്നത് അവസാനിപ്പിക്കണമെന്ന് കോഴിക്കോട്ട് നടക്കുന്ന കരിപ്പൂര്‍ രക്ഷായജ്ഞം പ്രമേയത്തിലൂടെ ആവശ്യപ്പെട്ടു. നിയമസഭയില്‍ കരിപ്പൂരിനു വേണ്ടി ഐകകണ്‌ഠ്യേന പ്രമേയം അവതരിപ്പിക്കണമെന്ന വി.ടി ബല്‍റാം എം.എല്‍.എയുടെ ആവശ്യം നിരാകരിച്ചത് മലബാറിനോട് ചെയ്ത അനീതിയാണ്. കരിപ്പൂര്‍ വിമാനത്താവളവും ഹജ്ജ് എംബാര്‍ക്കേഷനും നെടുമ്പാശ്ശേരിയിലേക്ക് കൊണ്ടുപോയ നടപടി മതേതരത്വത്തിന് യോജിച്ചതല്ലെന്നും മലബാര്‍ ഡവലപ്‌മെന്റ് ഫോറം കുറ്റപ്പെടുത്തി. എം.ഡി.എഫ് കരിപ്പൂര്‍ സംരക്ഷണ യജ്ഞത്തിന്റെ നാലാം ദിവസത്തെ പരിപാടി മലബാര്‍ ചേംബര്‍ ഓഫ് കൊമേഴ്‌സ് പ്രസിഡന്റും എയര്‍പോര്‍ട്ട് യൂസേഴ്‌സ് കണ്‍സള്‍ട്ടേറ്റീവ് കമ്മിറ്റിയംഗവുമായ പി.വി നിധീഷ് ഉദ്ഘാടനം ചെയ്തു. സി.പി.ഐ ജില്ലാ സെക്രട്ടറി ടി.വി ബാലന്‍ മുഖ്യപ്രഭാഷണം നടത്തി. മലബാര്‍ ഡവലപ്‌മെന്റ് ഫോറം പ്രസിഡന്റ് കെ.എം ബഷീര്‍ അധ്യക്ഷനായി.