ഫറോക്ക്: ജപ്പാന്‍ കുടിവെള്ള പദ്ധതിയുടെ പ്രധാന ഭൂഗര്‍ഭ പൈപ്പുപൊട്ടിയതിനെ തുടര്‍ന്ന് വെള്ളമൊഴുകി ഫറോക്ക് ടൗണിലും കരുവന്‍തിരുത്തിയിലും റോഡ് തകര്‍ന്നു. ഫറോക്ക് ടൗണില്‍ ഗതാഗതവും തടസപ്പെട്ടു. മെയിന്‍ ലൈനിലെ വാള്‍വ് അടച്ചതിനെ തുടര്‍ന്നാണ് വലിയ തോതിലുള്ള വെള്ളമൊഴുക്കും നാശനഷ്ടവും ഒഴിവായത്. വ്യാഴാഴ്ച പകല്‍ മൂന്നരയോടെയാണ് സംഭവം.
കഴിഞ്ഞ ഒരാഴ്ചയായി പെരുമുഖം ചെത്തലത്ത് പറമ്പിലെയും കരുവന്‍തിരുത്തിയിലെയും ജലസംഭരണിയിലേക്ക് വെള്ളമെത്തിക്കുന്നതിനുള്ള ട്രയല്‍ പമ്പിങ് നടന്നുവരികയാണ്. കുടിവെള്ള പദ്ധതി കമ്മിഷന്‍ ചെയ്യാനിരിക്കെ പരീക്ഷണാടിസ്ഥാനത്തില്‍ ജലം തുറന്നു വിട്ടുകൊണ്ടിരിക്കെയാണ് അപ്രതീക്ഷിതമായി ഫറോക്ക് ബസ്സ്റ്റാന്‍ഡിന് മുന്നിലെ കടലുണ്ടി റോഡ് നെടുകെ പിളര്‍ന്ന് വെള്ളം മുകളിലേക്ക് പ്രവഹിച്ചത്. നിമിഷം നേരം കൊണ്ട് ടൗണിലെ പ്രധാന റോഡുകളിലും ചെറിയ ഇടവഴികളിലും വെള്ളം പരന്നൊഴുകി. സ്റ്റാന്‍ഡിന് മുന്നില്‍ നിന്ന് വെള്ളം അല്‍പ്പ സമയത്തിനകം കരുവന്‍തിരുത്തി റോഡ് വരെ എത്തിയിരുന്നു. വെള്ളം പരന്നൊഴുകി സമീപത്തെ വീട്ടുമുറ്റത്തുവരെ തളംകെട്ടി നിന്നു.
സംഭവത്തെ തുടര്‍ന്ന് ഫറോക്ക് ടൗണില്‍ ജനങ്ങള്‍ തടിച്ചൂകൂടി. വിവരമറിഞ്ഞ് നഗരസഭാ ചെയര്‍പേഴ്‌സനും കൗണ്‍സിലര്‍മാരുമുള്‍പ്പെടെ വലിയ ഒരു സംഘവുമെത്തിയിരുന്നു. വാള്‍വ് അടച്ചതിനൊപ്പം യന്ത്രം ഉപയോഗിച്ചു തകര്‍ന്ന റോഡ് തല്‍ക്കാലത്തേക്ക് നിരപ്പാക്കി. അഞ്ചോ ആറോ വര്‍ഷം മുന്‍പ് റോഡിനടിയില്‍ സ്ഥാപിച്ച പൈപ്പുകളായതിനാല്‍ ചോര്‍ച്ചയുടെ കാരണമെന്താണെന്ന് ഉടന്‍ പറയാനാകില്ലെന്ന് എന്‍ജിനീയര്‍മാര്‍ അറിയിച്ചു. ചോര്‍ച്ച ഏറെ ദുര്‍ഘടം നിറഞ്ഞ സ്ഥലത്തായതിനാല്‍ അറ്റകുറ്റപ്പണി ദുഷ്‌കരമാകുമെന്നും ഉദ്യോഗസ്ഥര്‍ പറഞ്ഞു.