റിയാദ്: യമനില്‍ വിമത വിഭാഗമായ ഹൂതികള്‍ നടത്തിയ മിസൈല്‍ ആക്രമണത്തില്‍ അഞ്ചു മരണം. മആരിബ് പട്ടണം കേന്ദ്രീകരിച്ചാണ് ആക്രമണം നടന്നത്. സംഭവത്തില്‍ 22 പേര്‍ക്ക് പരുക്കേറ്റിട്ടുണ്ട്. ഇവിടെ നഗര മധ്യത്തിലെ തിരക്കുള്ള മാര്‍ക്കറ്റ് കേന്ദ്രമാക്കിയാണ് ഹൂതികള്‍ മിസൈല്‍ ആക്രമണം നടത്തിയത്. കഴിഞ്ഞയാഴ്ച ഹുദൈദ തുറമുഖത്തിന് സമീപം തുര്‍ക്കി കപ്പലിലുണ്ടായ തീപിടിത്തത്തിന് കാരണം ഹൂതികള്‍ നടത്തിയ ആക്രമണമായിരുന്നെന്നു യമനില്‍ യുദ്ധത്തിലേര്‍പ്പെട്ട അറബ് സഖ്യ സേനാ വക്താവ് കേണല്‍ തുര്‍ക്കി അല്‍ മാലികി പറഞ്ഞു.
റഷ്യയില്‍ നിന്ന് ഗോതമ്പുമായി വന്ന കപ്പലിന് നേരെയാണ് ആക്രമണമുണ്ടായത്. ആക്രമണം തുടരുന്ന സാഹചര്യത്തില്‍ ബാബു അല്‍ മന്‍ദബ് കടലിടുക്കിലൂടെയും ചെങ്കടലിലൂടെയും കടന്നു പോകുന്ന മുഴുവന്‍ കപ്പലുകള്‍ക്കും സുരക്ഷ ശക്തമാക്കിയതായി അദ്ദേഹം പറഞ്ഞു.
അതേസമയം, ഇറാന്‍ സഹായത്തോടെ അന്താരാഷ്ട്ര കടലിടുക്കില്‍ ആക്രമണത്തിന് തയാറെടുക്കുകയായിരുന്ന രണ്ട് ബോട്ടുകള്‍ സഖ്യ സേന തകര്‍ത്തു.
ഇന്നലെ രാവിലെയാണ് ഹൂതി ബോട്ടുകള്‍ സഖ്യ സേന തകര്‍ത്തത്. ചെങ്കടലില്‍ അന്താരാഷ്ട്ര കപ്പല്‍ ചാനലില്‍ സഞ്ചരിക്കുകയായിരുന്ന എണ്ണക്കപ്പലിനു നേരെ ആക്രമണം നടത്തുന്നതിനിടെയാണ് സഖ്യ സേന ബോട്ടുകള്‍ തകര്‍ത്തത്. രണ്ടു ബോട്ടുകള്‍ രക്ഷപ്പെടുകയും ചെയ്തിട്ടുണ്ട്.