വിജയവാഡ: ആന്ധ്രപ്രദേശ് സ്വദേശിയായ യുവതിയും ഏഴ് വയസുകാരനായ മകനും യു.എസില്‍ കൊല്ലപ്പെട്ട നിലയില്‍. എന്‍. ശശികല(40) , മകന്‍ അനിഷ് സായ് എന്നിവരെയാണ് ന്യൂജേഴിസിയിലെ വീട്ടില്‍ കൊല്ലപ്പെട്ട നിലയില്‍ കണ്ടെത്തിയത്. ഭര്‍ത്താവ് ഹനുമന്തപ്പ റാവു വ്യാഴാഴ്ച്ച വൈകീട്ട് ജോലി കഴിഞ്ഞ് വീട്ടിലെത്തിയപ്പോഴാണ് ഇരുവരെയും കൊല്ലപ്പെട്ട നിലയില്‍ കണ്ടെത്തിയത്.

ഒന്‍പത് വര്‍ഷമായി യു.എസിലുള്ള റാവുവും ഭാര്യ ശശികലയും സോഫ്റ്റ് വെയര്‍ പ്രൊഫഷണലുകളാണ്. ശശികല വീട്ടിലിരുന്നുകൊണ്ടാണ് ജോലി ചെയ്തിരുന്നത്. വംശീയ വിദ്വേഷമാണോ കൊലയ്ക്ക് പിന്നിലെ കാരണമെന്ന് വ്യക്തമല്ല.

നേരത്തെ കാന്‍സാസ് സിറ്റിയില്‍ തെലങ്കാനയില്‍ നിന്നുള്ള എന്‍ജിനീയര്‍ ശ്രീനിവാസ് കുച്ചിഭോട്‌ല വെടിയേറ്റു മരിച്ചിരുന്നു. സൗത്ത് കാരലൈനയില്‍ ഇന്ത്യന്‍ വംശജനും വ്യാപാരിയുമായ ഹര്‍ണിഷ് പട്ടേലും നേരത്തെ വെടിയേറ്റു മരിച്ചിരുന്നു.