കുന്നുംകൈ: ജില്ലയുടെ മലയോര മേഖലയില്‍ കുടിവെളളക്ഷാമം രൂക്ഷമാകുന്നു. ഉയര്‍ന്ന പ്രദേശങ്ങളിലെല്ലാം കിണറുകളും നീരുറവകളും വറ്റിവരണ്ടുകഴിഞ്ഞു. ചരിത്രത്തില്‍ ഉണ്ടാകാത്ത വിധം ജലക്ഷാമത്തെ നേരിടുകയാണ് മലയോര മേഖല. ഏപ്രിലില്‍ മഴ എത്തിയില്ലെങ്കില്‍ ദുരിതം ഏറും.
ജില്ലാഭരണകൂടത്തിന്റെ നിയന്ത്രണത്തില്‍ കുടിവെള്ളം എല്ലാ മേഖലകളിലും എത്തിക്കുമെന്ന് അറിയിച്ചിട്ടും ഇതിന്റെ പ്രാരംഭപ്രവര്‍ത്തനങ്ങള്‍ പോലും ആയിട്ടില്ല. പൊതുകിണറുകള്‍, കുളങ്ങള്‍ എന്നിവ ശുദ്ധീകരിക്കാന്‍ പഞ്ചായത്തധികൃതര്‍ മുന്‍കൈയെടുത്താല്‍ അതും വലിയ തോതില്‍ പ്രയോജനപ്പെടുമെങ്കിലും അത്തരം പ്രവര്‍ത്തനങ്ങള്‍ നടത്താന്‍ പഞ്ചായത്ത് മടിക്കുകയാണ് .
തൊഴിലുറപ്പ് ജോലിയിലുള്‍പ്പെടുത്തി പണികള്‍ സുഗമമായി നടത്താമെങ്കിലും ബന്ധപ്പെട്ടവര്‍ക്ക് അനക്കമില്ലെന്ന് നാട്ടുകാര്‍ ആരോപിക്കുന്നു. ചെറുകിട കുടിവെള്ളപദ്ധതികളും മിക്കയിടങ്ങളിലും അഴിമതിയുടെയും പാതിവഴിയിലുമായി നിലകൊള്ളുന്നു. കുടിവെള്ള പൈപ്പുകള്‍ പൊട്ടിയതുമൊക്കെയായി ചെറിയ തകരാര്‍ ഉണ്ടങ്കിലും പരിഹരിക്കാന്‍ അധികൃതര്‍ മിനക്കെടാറില്ല. കരിങ്കല്‍ ഖനന കുഴികളിലും പൊതുകുളങ്ങളിലും മറ്റുമായി ഏറെ ജലം കെട്ടി നില്‍ക്കുന്നുണ്ട്. ഇതു ശുദ്ധീകരിച്ച് ഉപയോഗപ്രദമാക്കാവുന്ന പദ്ധതിക്കു പോലും വിവിധ പഞ്ചായത്തുകള്‍ ശ്രമിക്കാത്തതും ആക്ഷേപത്തിനിടയാക്കിയിട്ടുണ്ട് .
വെസ്റ്റ് എളേരി, ബളാല്‍, ഈസ്റ്റ് എളേരി പഞ്ചായത്തുകളിലെ ഒട്ടുമിക്ക ഭാഗങ്ങളിലും കുടിവെള്ള ക്ഷാമം രൂക്ഷമായിത്തുടങ്ങിയിട്ടുണ്ട്. പരമ്പരാഗത ജലസ്രോതസുകളായ കിണറുകളും കുളങ്ങളും വേനലിന്റെ ആദ്യഘട്ടത്തില്‍ തന്നെ വറ്റിവരണ്ടതുംപ്രയാസം സൃഷ്ട്ടിച്ചിട്ടുണ്ട്. അതേസമയം പുഴകളില്‍ നിന്ന് അനിയന്ത്രിതമായി ജലം ഊറ്റുന്നത് ജില്ലാ ഭരണകൂടം വിലക്കിയതിനാല്‍ സമീപത്തെ കിണറുകളില്‍ വെള്ളം വറ്റിപ്പോകുന്നതും പ്രതിസന്ധിക്ക് ആക്കം കൂട്ടുന്നു.
പുഴകളില്‍ നിന്നു കുടിവെള്ളത്തിനായി എടുക്കുന്നതിനായി സ്ഥാപിച്ച മോട്ടോറുകള്‍ പഞ്ചായത്തധികൃതര്‍ നശിപ്പിച്ചതായി നാട്ടുകാര്‍ പരാതിപ്പെടുന്നു. വരും ദിവസങ്ങളില്‍ വേനല്‍ കടുക്കുമെന്നതിനാല്‍ അപ്പോഴുണ്ടാകുന്ന ജലക്ഷാമത്തെ ഏത് വിധത്തില്‍ അതിജീവിക്കുമെന്ന ആശങ്കയിലാണ് ജനം.