കരുനാഗപ്പള്ളി: പൊലിസിനെ ആക്രമിച്ച കേസിലെ പ്രതിയുള്‍പ്പെടെ രണ്ടുപേര്‍ കഞ്ചാവുമായി പിടിയില്‍. ഓച്ചിറ സ്റ്റേഷനിലെ പൊലിസുകാരെ ആക്രമിച്ചതുള്‍പ്പെടെ നിരവധി ക്രിമിനല്‍ കേസുകളിലെ പ്രതിയായ ചേന്നല്ലൂര്‍ തറയില്‍ മുഹമ്മദ് ഷെഫീഖ് (33), ആരിസ് മുഹമ്മദ് (34) എന്നിവരെയാണ് 450 പൊതി കഞ്ചാവുമായി കരുനാഗപ്പള്ളി റെയ്ഞ്ച് ഷാഡോ ഇന്‍സ്‌പെക്ടര്‍ ജോസ് പ്രതാപിന്റെ നേതൃത്വത്തില്‍ പിടികൂടിയത്.
പ്രയാര്‍ കാമാണ്ടിശ്ശേരി ക്ഷേത്രത്തിനു സമീപത്തുനിന്നാണ് പ്രതികള്‍ പിടിയിലായത്. വവ്വാക്കാവ് എന്‍ജിനിയറിങ് കോളജിന് സമീപവും പ്രയാര്‍, ഇടയനമ്പലം ഭാഗങ്ങളിലെ ചില വീടുകള്‍ കേന്ദ്രികരിച്ചും സാമൂഹ്യവിരുദ്ധരുടെ സംഘം ചേരലും കഞ്ചാവും മറ്റ് ലഹരി വസ്തുക്കളുടെ ഉപയോഗം കൂടിവരുകയായിരുന്നു. ഗോവ, ബാംഗ്ലൂര്‍, കമ്പം, തേനി, മൂന്നാര്‍, കൊടൈക്കനാല്‍ ഭാഗങ്ങളില്‍നിന്ന് വലിയ തോതില്‍ കഞ്ചാവ് കൊണ്ടുവന്നായിരുന്നു വില്‍പനയും സംഘം ചേര്‍ന്നുള്ള ഉപയോഗവും.
കുറച്ചു ദിവസം മുന്‍പ് രണ്ട് ഗ്രാം എം.ഡി.എം.എയുമായി കോയിവിള സ്വദേശിയെ അറസ്റ്റ് ചെയ്തിരുന്നു. ഇയാള്‍ക്ക് എം.ഡി.എം.എ നല്‍കിയ നഗരത്തിലെ ഒരു എന്‍ജിനിയറിങ് കോളജില്‍ പഠിക്കുന്ന എറണാകുളം സ്വദേശിയായ വിദ്യാര്‍ഥി എക്‌സൈസ് നിരീക്ഷണത്തിലാണ്. പ്രിവന്റീവ് ഓഫീസര്‍മാരായ സുരേഷ് കുമാര്‍, ഹരികൃഷ്ണന്‍ സിവില്‍ എക്‌സൈസ് ഓഫീസര്‍മാരായ വിജു, സൗമ്യ, സജീവ്കുമാര്‍, ജിനു തങ്കച്ചന്‍ എന്നിവരും സംഘത്തിലുണ്ടായിരുന്നു.