ഫറോക്ക് (കോഴിക്കോട്): 13 ലക്ഷം രൂപയുടെ ചെക്ക് തട്ടിപ്പറിച്ചു പണം മാറിയെടുത്ത കേസില്‍ ഇതരസംസ്ഥാനക്കാരായ കുപ്രസിദ്ധ മോഷ്ടാക്കള്‍ പിടിയില്‍. ഛത്തിസ്ഗഡ് കോര്‍ബ സ്വദേശികളായ കമല്‍ കുമാര്‍ അഗര്‍വാള്‍ (37), മനോജ് സാഹു (37) എന്നിവരാണ് പിടിയിലായത്. കോര്‍ബയിലെ ചീട്ടുകളി കേന്ദ്രത്തില്‍ നിന്നാണ് ഫറോക്ക് പൊലിസ് സ്‌റ്റേഷനിലെ ക്രൈം എസ്.ഐ എന്‍. സുബൈറും സംഘവും പ്രതികളെ സാഹസികമായി കസ്റ്റഡിയിലെടുത്തത്. രാമനാട്ടുകരയിലെ വി.കെ.സി പോളിമേഴ്‌സിന്റെ ചെക്കാണ് പ്രതികള്‍ ഡല്‍ഹിയില്‍നിന്ന് തട്ടിപ്പറിച്ചെടുത്തത്.
വി.കെ.സി പോളിമേഴ്‌സിലേക്ക് അസംസ്‌കൃത സാധനങ്ങള്‍ വാങ്ങുന്ന ഡല്‍ഹിയിലെ മംഗള ട്രെഡേഴ്‌സിന് 13ലക്ഷം രൂപയുടെ ചെക്ക് കൊറിയര്‍ വഴി അയച്ചുകൊടുത്തതായിരുന്നു. ചെക്ക് അടങ്ങിയ ബാഗ് ഡെലിവറി ജീവനക്കാരനില്‍നിന്ന് പ്രതികള്‍ തട്ടിപ്പറിച്ചെടുക്കുകയായിരുന്നു. ചെക്ക് ഹരിയാനയില്‍ നിന്നാണ് കമല്‍ കുമാറിന്റെ ഭാര്യ സുനിതാ ദേവിയുടെ ബാങ്ക് അക്കൗണ്ടിലേക്ക് ഡെപ്പോസിറ്റ് ചെയ്തത്. പിന്നീട് ഛത്തിസ്ഗഡിലെത്തി കോര്‍ബ എസ്.ബി.ഐ ബാങ്കില്‍ നിന്നുമാണ് പണം പിന്‍വലിക്കുന്നത്. 10ലക്ഷം രൂപ കമല്‍ കുമാറും 3ലക്ഷം രൂപ മനോജ് സാഹുവും എടുക്കുകയായിരുന്നുവെന്ന് പൊലിസ് പറഞ്ഞു.
മാസങ്ങള്‍ കഴിഞ്ഞിട്ടും വാങ്ങിയ സാധനങ്ങളുടെ പണം കിട്ടാത്തതിനെ തുടര്‍ന്നു ഡല്‍ഹിയിലെ മംഗള ട്രെഡ്‌ഴ്‌സ് വി.കെ.സി പോളിമേഴ്‌സിനെ അറിയിച്ചതോടെയാണ് പണം അപഹരിച്ച വിവരം അറിയുന്നത്. തുടര്‍ന്ന് നടത്തിയ പരിശോധനയിലാണ് അക്കൗണ്ടില്‍നിന്ന് പണം പിന്‍വലിച്ചതായി കാണുന്നത്. വി.കെ.സി അധികൃതര്‍ ഡി.ജി.പിക്കു നേരിട്ടു പരാതി നല്‍കി. കോഴിക്കോട് കമ്മിഷണര്‍ക്കു കൈമാറിയ പരാതിയില്‍ ഫറോക്ക് പൊലിസിനെ അന്വേഷണത്തിന് ഏല്‍പ്പിക്കുകയായിരുന്നു. 15 ദിവസത്തോളം ഡല്‍ഹിയിലും ഛത്തിസ്ഗഡിലുമായി അന്വേഷണം നടത്തിയതിനു ശേഷമാണ് പ്രതികളെ കണ്ടെത്താനായത്. കോര്‍ബ പൊലിസിന്റെ സഹായത്തോടെയാണ് പ്രതികളെ വലയിലാക്കുന്നത്. അറസ്റ്റിലായ കമല്‍കുമാര്‍ കോര്‍ബയിലും മറ്റുമായി നിരവധി കേസുകളില്‍ പ്രതിയാണ്. കോര്‍ബ കോടതിയില്‍ ഹാജരാക്കിയതിനു ശേഷമാണ് പ്രതികളെ കേരളത്തിലേക്ക് കൊണ്ടു വന്നത്. അപഹരിച്ച പണമുപയോഗിച്ച് കമല്‍ കുമാര്‍ വാങ്ങിയ ഹ്യുണ്ടായി ഇയോണ്‍ കാറും പൊലിസ് കസ്റ്റഡിയിലെടുത്തു. 2,200 കിലോമീറ്റര്‍ താണ്ടി ഈ കാറിലാണ് പ്രതികളെ പൊലിസ് ഫറോക്കിലെത്തിച്ചത്. ഫറോക്ക് എ.എസ്.ഐ എം.എം പ്രകാശ്, സിവില്‍ പൊലിസ് ഓഫിസര്‍ രമേശ് ബാബു എന്നിവരും അന്വേഷണ സംഘത്തിലുണ്ടായിരുന്നു.