മെഡിക്കല്‍ കോളജ്: അര്‍ധരാത്രി  വീട്ടില്‍ അതിക്രമിച്ചുകയറി യുവതിയെയും യുവാവിനെയും കൊലപ്പെടുത്താന്‍ ശ്രമിച്ച പ്രതി പിടിയില്‍. ആക്കുളം പ്രശാന്ത് നഗര്‍ പണയില്‍ വീട്ടില്‍ രഞ്ജിത്ത് (35) ആണ് അറസ്റ്റിലായത്.
ഈ കേസിലെ മറ്റു രണ്ടുപേരായ കണ്ണന്‍, അനുജന്‍ രതീഷ് എന്നിവര്‍ നേരത്തെ അറസ്റ്റിലായിരുന്നു. കണ്ണമ്മൂല ചെട്ടിക്കുന്ന് നെല്ലിക്കുഴി ചരുവിള കുന്നില്‍ വീട്ടില്‍ സുനില്‍കുമാറിനെയും ഇയാളുടെ ഭാര്യ അശ്വതിയെയുമാണ് മൂവര്‍സംഘം കൊലപ്പെടുത്താന്‍ ശ്രമിച്ചത്. മുമ്പ് ഇവിടത്തെ റസി. അസോസിയേഷന്‍ ജോയി. സെക്രട്ടറിയായിരുന്ന സുനില്‍കുമാറും പ്രതികളും തമ്മില്‍ വാക്കേറ്റമുണ്ടായിരുന്നു.  ഇതിനു പ്രതികാരമായിട്ടായിരുന്നു ആക്രമണം. രഞ്ജിത്തിനെതിരേ മെഡിക്കല്‍കോളജിലെ ഒരു പൊലിസുകാരനെ ആക്രമിച്ചതിനു കേസുണ്ട്. മെഡിക്കല്‍കോളജ് സി.ഐ സി. ബിനുകുമാര്‍, എസ്.ഐഗിരിലാല്‍, അഡീ. എസ്.ഐ സാബു, ക്രൈം എസ്.ഐ ബാബു എന്നിവര്‍ ചേര്‍ന്നു പിടികൂടിയ പ്രതിയെ കോടതിയില്‍ ഹാജരാക്കി.