പാപ്പിനിശ്ശേരി: ലോറിയില്‍ കൂടുതല്‍ ഉയരത്തില്‍ മുള കയറ്റി വരികയായിരുന്ന ലോറി ഇലക്ട്രിക് പോസ്റ്റിലിടിച്ചതിനെത്തുടര്‍ന്ന് ഏഴ് പോസ്റ്റുകള്‍ തകര്‍ന്നു. പാപ്പിനിശ്ശേരി വെസ്റ്റ് കരിക്കന്‍കുളത്തിന് സമീപം ഇന്നലെ പുലര്‍ച്ചെ മൂന്നു മണിക്കാണ് അപകടം. മംഗലാപുരത്ത് നിന്നു പാലക്കാടേക്ക് പോകുന്ന ലോറിയാണ് നാശനഷ്ടമുണ്ടാക്കിയത്.  ഒന്നിന് പുറകെ ഒന്നായി ഏഴു പോസ്റ്റുകള്‍ തകര്‍ന്നു. പോസ്റ്റുകള്‍ തകര്‍ന്നത് മൂലം വൈദ്യുത ലൈനുകള്‍ പൊട്ടി വീണു.  ഉടന്‍ തന്നെ വൈദ്യുതബന്ധം വിച്ഛേദിപ്പിച്ചതിനാല്‍ അപകടം ഒഴിവായി. സമീപത്തെ വീടിന്റെ ഓടുകളും  പൊട്ടിയിട്ടുണ്ട്. തകരാറിലായ പോസ്റ്റുകള്‍ ഇന്നലെ  മാറ്റി സ്ഥാപിച്ചു. നാശനഷ്ടം ഉണ്ടാക്കിയ ലോറി നിര്‍ത്താതെ പോകയതിനെത്തുടര്‍ന്ന് ഹാജി റോഡിന് സമീപം നാട്ടുകാര്‍ തടഞ്ഞു. പോസ്റ്റുകള്‍ തകര്‍ത്തത് മൂലമുണ്ടായ നഷ്ടപരിഹാരം നല്‍കാത്തതിനാല്‍ ലോറി വിട്ടു നല്‍കിയില്ല. കെ.എസ്.ഇ.ബി അധികൃതര്‍ വളപട്ടണം പൊലിസില്‍ പരാതി നല്‍കി.