കോഴിക്കോട്: ജില്ലയിലെ കച്ചവടസ്ഥാപനങ്ങള്‍ പ്രവര്‍ത്തിക്കുന്ന പരിസരങ്ങളില്‍ ഉടമകള്‍ ശുചീകരണ പ്രവര്‍ത്തനങ്ങള്‍ നടത്തണമെന്ന് മന്ത്രി ടി.പി രാമകൃഷ്ണന്‍. ഇതരസംസ്ഥാന തൊഴിലാളികളുടെ താമസസ്ഥലങ്ങളില്‍ പരിശോധന നടത്തി നിയമലംഘനങ്ങള്‍ കണ്ടെത്തിയാല്‍ നടപടി സ്വീകരിക്കും.
തദ്ദേശസ്ഥാപനങ്ങള്‍ റസിഡന്‍സ് അസോസിയേഷനുകളെ വിളിച്ചുചേര്‍ത്ത് ശുചീകരണ പ്രവര്‍ത്തനങ്ങള്‍ നടത്തണം. മാലിന്യസംസ്‌കരണത്തിനുള്ള സംവിധാനം അതതു പ്രദേശത്തുതന്നെ ഏര്‍പ്പെടുത്തണമെന്നും ഇക്കാര്യത്തില്‍ എന്തെങ്കിലും എതിര്‍പ്പുണ്ടെങ്കില്‍ പരിഹരിക്കുന്നതിന് കലക്ടറെ ചുമതലപ്പെടുത്തുമെന്നും മഴക്കാലപൂര്‍വ ശുചീകരണത്തിന്റെ ഭാഗമായി കലക്ടറേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ മന്ത്രി അറിയിച്ചു.
കോഴിക്കോടിനെ സീറോ വേസ്റ്റ് ജില്ലയാക്കാനുള്ള പ്രവര്‍ത്തനങ്ങളാണ് സര്‍ക്കാര്‍ നടത്തുന്നത്. തദ്ദേശ സ്വയംഭരണ സ്ഥാപനങ്ങള്‍ വഴി മാലിന്യം നീക്കം ചെയ്യുന്നതിനും സംസ്‌കരിക്കുന്നതിനുമുള്ള സംഘടിതമായ ശ്രമം നടക്കുകയാണ്. ഇതിനു കച്ചവടസംഘടനകളും തൊഴിലാളി സംഘടനകളും സംയുക്തമായി പ്രവര്‍ത്തിച്ച് ആവശ്യമായ നടപടികള്‍ സ്വീകരിക്കണം.
ശുചീകരണ പ്രവര്‍ത്തനങ്ങള്‍ക്ക് എല്ലാ വിധ സഹകരണവും സംഘടനാ പ്രതിനിധികള്‍ യോഗത്തില്‍ ഉറപ്പു നല്‍കി. യോഗത്തില്‍ ഡി.എം.ഒ വി. ജയശ്രീ, മെറിന്‍ ജോസഫ് ഐ.പി.എസ്, ഹെല്‍ത്ത് ഓഫിസര്‍ ഡോ. ഗോപകുമാര്‍, വ്യാപാരി വ്യവസായ പ്രതിനിധികള്‍, ലയണ്‍സ് ക്ലബ് അസോസിയേഷന്‍ പ്രതിനിധികള്‍, വഴിയോര സംഘടന തൊഴിലാളി പ്രതിനിധികള്‍, ഹോട്ടല്‍ ആന്‍ഡ് റസ്റ്ററന്റ് പ്രതിനിധികള്‍ പങ്കെടുത്തു.