ആലപ്പുഴ : സാമ്പത്തിക പ്രതിസന്ധി നേരിടുന്ന കെ.എസ്.ആര്‍.ടി.സിയെ രക്ഷിക്കാന്‍ മാനേജിങ് ഡയരക്ടര്‍ ടോമിന്‍ തച്ചങ്കരിക്ക് കഴിയുമോയെന്ന് ജീവനക്കാര്‍. പ്രതിദിനം ആറു കോടി വരുമാനമുളള കെ.എസ്.ആര്‍.ടി.സിക്ക് മുന്നിലുള്ള 242 കോടിയുടെ കടബാധ്യത പരിഹരിക്കാനുള്ള തുക എവിടെ നിന്ന് കണ്ടെത്തുമെന്നത് വലിയ പ്രശ്‌നമാണ്.
പ്രതിദിനം ലഭിക്കുന്ന പണത്തില്‍ നിന്ന് 3.5 കോടി ഡീസലിനും ഒരു കോടി ബാങ്കുകളിലെ വായ്പകളുടെ പലിശയിനത്തിലും നല്‍കേണ്ടതുണ്ട്. 45,000 ജീവനക്കാരുളള കെ.എസ് ആര്‍.ടി.സിയില്‍ ശമ്പളം ഇനത്തില്‍ നല്‍കേണ്ടത് 102 കോടിയാണ്. പ്രതിദിനം ലഭിക്കുന്ന കലക്ഷനില്‍ നിന്ന് മിച്ചംവരുന്ന തുക സമാഹരിച്ചാല്‍ ഒരു മാസം 45 കോടി രൂപയാണുണ്ടാകുന്നത്. ശമ്പള ഇനത്തിലേക്കുള്ള തുകക്ക് അധികം വേണ്ട 62 കോടി പുറത്തുനിന്ന് കണ്ടെത്തണം.
ആകെ 6,400 ബസുകളാണ് കെ. എസ് .ആര്‍. ടി. സിക്ക് സ്വന്തമായുളളത്. ഇതില്‍ 1000 എണ്ണവും കട്ടപ്പുറത്താണ്. ഏകദേശം 32,000 കണ്ടക്ടര്‍മാരും ഡ്രൈവര്‍മാരും ജോലി ചെയ്യുന്നുണ്ട്. ആയിരം ബസുകള്‍കൂടി സര്‍വിസ് നടത്താന്‍ കഴിഞ്ഞാല്‍ കെ. എസ് .ആര്‍. ടി. സിയുടെ വരുമാനം വര്‍ധിക്കുമെന്നും നിലവിലുള്ള നഷ്ടത്തിന്റെ കണക്ക് ഏറെക്കുറെ പരിഹരിക്കാന്‍ കഴിയുമെന്നുമാണ് വിലയിരുത്തപ്പെടുന്നത്. ഇതിനുളള ശ്രമം നടക്കുന്നുണ്ടെന്നാണ് വിവരം.
അതേസമയം ജീവനക്കാരുടെ പി.എഫ് ഇനത്തില്‍ 100 കോടി രൂപ കുടിശികയാണ്. ഇതിനുള്ള തുകയും കണ്ടെത്തേണ്ടതുണ്ട്. കടുത്ത പ്രതിസന്ധിയിലായിട്ടും ജീവനക്കാരില്‍ ചിലര്‍ എം.ഡിയുടെ പുതിയ പരിഷ്‌കാരങ്ങളോട് യോജിക്കാനും സ്ഥാപനത്തെ ലാഭകരമാക്കാനുള്ള ശ്രമത്തെ സഹായിക്കാനും തയാറല്ലെന്നതാണ് വാസ്തവം.