ബോവിക്കാനം: തെരുവുനായക്കൂട്ടം മൂന്ന് ആടുകളെ കടിച്ചു കൊന്നു. ബോവിക്കാനം ആലൂരിലെ അബ്ദുല്‍ ഖാദറിന്റെ ആടുകളെയാണ് നായക്കൂട്ടം കടിച്ചു കൊന്നത്. ഇന്നലെ രാവിലെയോടെ വീടിനു സമീപത്തെ റോഡരികില്‍ വച്ചാണ് നായകള്‍ ആടുകളെ അക്രമിച്ചത്.
മുളിയാര്‍ പഞ്ചായത്തിന്റെ വിവിധ ഭാഗങ്ങളില്‍ വീണ്ടും തെരുവുനായ ശല്യം രൂക്ഷമായിരിക്കുകയാണ്. ആലൂര്‍, ബോവിക്കാനം ടൗണ്‍, നുസ്‌റത്ത് നഗര്‍, മുതലപ്പാറ, എന്നിവിടങ്ങളിലാണ് തെരുവുനായകള്‍ വിലസുന്നത്.
രാത്രിയും പകലുമെന്നില്ലാതെ നായകള്‍ തെരുവ് കൈയടക്കുമ്പോള്‍ ജനം ഭയചകിതരാകുകയാണ്.
പ്രഭാത നമസ്‌കാരത്തിനു പള്ളിയില്‍ പോകുന്നവരും നടക്കാന്‍ പോകുന്നവരുമൊക്കെ കൈയില്‍ വടി കരുതേണ്ട സാഹചര്യമാണ്. തെരുവുനായകളുടെ ശല്യം നിയന്ത്രിക്കാന്‍ അധികൃതര്‍ നടപടി സ്വീകരിക്കണമെന്നാണ് നാട്ടുകാര്‍ ആവശ്യപ്പെടുന്നത്.