ലണ്ടന്‍: ശ്രീലങ്കയ്‌ക്കെതിരായ ഏകദിന പരമ്പര ഇംഗ്ലണ്ട് സ്വന്തമാക്കി. നാലാം മത്സരത്തില്‍ ആറു വിക്കറ്റിന് ജയിച്ചതോടെ പരമ്പര ആതിഥേയര്‍ സ്വന്തമാക്കുകയായിരുന്നു. 

നേരത്തെ ആദ്യ മത്സരം ടൈ ആയപ്പോള്‍ മൂന്നാം ഏകദിനം മഴമൂലം ഉപേക്ഷിക്കുകയും ചെയ്തിരുന്നു. രണ്ടാം ഏകദിനത്തില്‍ ഇംഗ്ലണ്ട് നേരത്തെ ജയിച്ചതിനാല്‍ ഈ ജയത്തോടെ പരമ്പര ഇംഗ്ലണ്ടിന് 2-0ന് സ്വന്തമായി.
നിര്‍ണായക മത്സരത്തില്‍ ലങ്ക ഉയര്‍ത്തിയ 306 റണ്‍സ് വിജയ ലക്ഷ്യം 11 പന്ത് ബാക്കി നില്‍ക്കെ നാലു വിക്കറ്റ് നഷ്ടത്തില്‍ മറികടക്കുകയായിരുന്നു ഇംഗ്ലണ്ട്. തുടക്കം മോശമായെങ്കിലും ജേസന്‍ റോയി(162)യുടെ തകര്‍പ്പന്‍ സെഞ്ച്വറി ഇംഗ്ലണ്ടിനെ വന്‍ ജയത്തിലെത്തിക്കുകയായിരുന്നു.
118 പന്ത് നേരിട്ട റോയ് 13 ബൗണ്ടറിയും മൂന്നു സിക്‌സറുകളും പറത്തി. മോയിന്‍ അലി(2) നിരാശപ്പെടുത്തിയെങ്കിലും ജോ റൂട്ട്(65) ഇയാന്‍ മോര്‍ഗന്‍(22) ജോണി ബെയര്‍‌സ്റ്റോ(29*) ജോസ് ബട്‌ലര്‍(17*) എന്നിവരുടെ ഇന്നിങ്‌സുകള്‍ ഇംഗ്ലണ്ട് വിജയത്തില്‍ നിര്‍ണായകമായി.
നേരത്തെ ടോസ് നേടിയ ഇംഗ്ലണ്ട് ലങ്കയെ ബാറ്റിങിനയക്കുകയായിരുന്നു. മഴമൂലം മത്സരം 42 ഓവറാക്കി ചുരുക്കി. കുശാല്‍ പെരേര(1) പെട്ടെന്ന് പുറത്തായെങ്കിലും കുശാല്‍ മെന്‍ഡിസ്(77) ധനുഷ്‌ക ഗുണതിലക(62) ദിനേഷ് ചാന്‍ഡിമല്‍(63) എയ്ഞ്ചലോ മാത്യൂസ്(67*) എന്നിവരുടെ ഇന്നിങ്‌സുകള്‍ ലങ്കയ്ക്ക് കൂറ്റന്‍ സ്‌കോര്‍ സമ്മാനിക്കുകയായിരുന്നു.