പെരിങ്ങോം: നാടന്‍ തോക്കുകള്‍ സഹിതം അഞ്ചുപേര്‍ അറസ്റ്റില്‍. പെരിങ്ങോം പൊലിസ് സ്റ്റേഷന്‍ പരിധിയിലെ കോടന്നൂര്‍ മടക്കാംപൊയില്‍ സ്വദേശികളായ ടി.വി സൈനേഷ്(24), പി. നിധിന്‍(21), അന്നൂക്കാരന്‍ വിനീഷ്(30), അന്നൂക്കാരന്‍ ഗോവിന്ദന്‍(61), അരവഞ്ചാലിലെ പി. രമേശന്‍(46) എന്നിവരാണ് അറസ്റ്റിലായത്. തളിപ്പറമ്പ് ഡിവൈ.എസ്.പി കെ.വി വേണുഗോപാലിന് ലഭിച്ച രഹസ്യവിവരത്തെ തുടര്‍ന്ന് ക്രൈം സ്‌ക്വാഡിലെ സുരേഷ് കക്കറ, കെ.വി രമേശന്‍, തളിപ്പറമ്പ് എസ്.ഐ കെ. ദിനേശന്‍, പെരിങ്ങോം എസ്.ഐ മഹേഷ് കെ. നായര്‍ എന്നിവര്‍ ഉള്‍പ്പെട്ട സംഘം നടത്തിയ റെയ്ഡിലാണ് മികച്ച സാങ്കേതികവിദ്യയോടെ നിര്‍മിക്കപ്പെട്ട അഞ്ച് തോക്കുകള്‍ സഹിതം ഇവര്‍ പിടിയിലായത്. നായാട്ടിന് വേണ്ടിയാണ് ഇവ ഉപയോഗിച്ചിരുന്നതെന്ന് പൊലിസ് പറഞ്ഞു. സൈനേഷും വിനീഷും നേരത്തെ പന്നിയെ വെടിവയ്ക്കുന്നതിനിടെ ഒരു സ്ത്രീക്ക് വെടികൊണ്ട് മാരകമായി പരുക്കേറ്റ സംഭവത്തില്‍ പ്രതികളാണ്. ഇവര്‍ക്ക് തോക്ക് നിര്‍മിച്ചു നല്‍കിയ ചീമേനി പള്ളിപ്പാറയിലെ ബാലകൃഷ്ണനെ കണ്ടെത്താന്‍ അന്വേഷണം തുടരുകയാണ്. ഇന്നലെ രാത്രി പത്തോടെ പൊലിസ് ഇയാളുടെ വീട്ടില്‍ റെയിഡ് നടത്തിയെങ്കിലും പിടികൂടാനായില്ല. ഇയാള്‍ ഒളിവിലാണെന്ന് പൊലിസ് പറഞ്ഞു. പിടികൂടിയവരെ ചോദ്യം ചെയ്തുവരികയാണ്. ഇന്ന് കോടതിയില്‍ ഹാജരാക്കും.