ലണ്ടന്‍: അടുത്ത സീസണില്‍ ലീവര്‍പൂളിന്റെ മധ്യനിരക്ക് ശക്തിപകരാന്‍ മൊണോക്കോയുടെ ബ്രസീലിയന്‍ താരം ഫാബിഞ്ഞോയെ ടീമിലെത്തിച്ച് ലിവര്‍പൂള്‍. 43.7 മില്യന്‍ യൂറോക്കാണ് മൊണോക്കോയില്‍ നിന്ന് താരം ലിവര്‍പൂളിലെത്തിയത്.
ചാംപ്യന്‍സ് ലീഗ് ഫൈനലിന് ശേഷം ലിവര്‍പൂളിന്റെ മധ്യനിരക്ക് കരുത്ത് കുറവാണെന്ന ആരോപണമുയര്‍ന്ന സാഹചര്യത്തിലാണ് മധ്യനിരയിലെ മികച്ച പ്രകടനക്കാരനും പെനാല്‍റ്റി സ്‌പെഷലിസ്റ്റുമായ താരത്തെ ടീമിലെത്തിച്ചത്. ഇനിമുതല്‍ ലിവര്‍പൂളിനായി ഫാബിഞ്ഞോയായിരിക്കും പെനാല്‍റ്റി കിക്കെടുക്കുക.
2016-17 സീസണില്‍ മൊണോക്കോക്ക് വേണ്ടി ഫാബിഞ്ഞോ മികച്ച പ്രകടനം നടത്തിയിരുന്നു.
റോമയിലായിരുന്ന മുഹമ്മദ് സലാഹിനെ ടീമിലെത്തിച്ച് ലിവര്‍പൂളിനും സലാഹിനും പുതിയൊരു മാനം നല്‍കിയത് ക്ലോപ്പിന്റെ തന്ത്രമായിരുന്നു. ഫാബീഞ്ഞോയെ ടീമിലെത്തിക്കുന്നതിലൂടെ ഇത്തരത്തിലൊരു പുതിയ താരോദയവും ടീമിന് പുതിയൊരു കെട്ടുറപ്പുമാണ് ലക്ഷ്യമിടുന്നതെന്ന് ക്ലോപ്പ് പറഞ്ഞു.
ആറടി രണ്ടിഞ്ചുള്ള താരത്തിന്റെ ഉയരം പ്രതിരോധത്തില്‍ തിളങ്ങാന്‍ കഴിയും. അറ്റാക്കിങ്ങ് മിഡ്ഫീല്‍ഡറുടെ റോളിലും കരുത്ത് കാണിക്കാന്‍ ഫാബിഞ്ഞോക്കാകും.