കല്‍പ്പറ്റ: ബംഗളൂരുവില്‍നിന്നു വീട്ടിലെത്തിയ മകനുമായി തുടര്‍ച്ചയായി ഇടപഴകിയതിനാല്‍ സെല്‍ഫ് ക്വാറന്റൈന്‍ ആവശ്യപ്പെട്ട ഡോക്ടര്‍ക്ക് ജില്ലാ ആശുപത്രിയില്‍ സുപ്രധാന ചുമതല നല്‍കി ആരോഗ്യ വകുപ്പ്. 

ജില്ലയിലെ കൊവിഡ് ചികിത്സാ കേന്ദ്രമായ ജില്ലാ ആശുപത്രിയിലെ ഡോക്ടര്‍ സെല്‍ഫ് ക്വാറന്റൈന്‍ അനുവദിക്കണമെന്ന് ആവശ്യപ്പെട്ട് കഴിഞ്ഞ 24ന് കത്തു നല്‍കിയിരുന്നു. മകന്റെ സ്രവം പരിശോധനയ്ക്ക് അയച്ചതായും ഫലം വരുന്നതുവരെ അവധി വേണമെന്നും കത്തില്‍ ആവശ്യപ്പെട്ടു. 

എന്നാല്‍ കത്തുകിട്ടി രണ്ടു ദിവസത്തിനു ശേഷം ഇതേ ഡോക്ടറെ കോവിഡ് നോഡല്‍ ഓഫിസറായി നിയമിച്ച് ആരോഗ്യ വകുപ്പ് ഉത്തരവിറക്കി. തുടര്‍ന്ന് ഡോക്ടര്‍ ജോലിക്ക് ഹാജരാകുകയും ചെയ്തു. കത്ത് 25നു സൂപ്രണ്ട് ഓഫിസില്‍ സ്വീകരിച്ചതായി രേഖകള്‍ പറയുന്നു. എന്നാല്‍ ഈ ദിവസങ്ങളില്‍ ഇദ്ദേഹത്തിന് അവധി നല്‍കുകയോ, ഇദ്ദേഹം അവധിയെടുക്കുകയോ ചെയ്തിട്ടില്ലായെന്നുള്ളതാണ് ആശങ്കപ്പെടുത്തുന്നത്.

ഇത്തരമൊരു കത്ത് തന്റെ ശ്രദ്ധയില്‍പ്പെട്ടിട്ടില്ലെന്നാണ് ഡി.എം.ഒ പറയുന്നത്. എന്നാല്‍ തന്റെ സ്വന്തം ആവശ്യത്തിന് ലീവെടുത്തതായിരുന്നെന്നും ഡി.എം.ഒ നിര്‍ദേശിച്ചത് അനുസരിച്ചാണ് ജോലിയില്‍ പ്രവേശിച്ചതെന്നും ഡോക്ടര്‍ പറയുന്നു.കൂടാതെ വ്യക്തി വിരോധത്തിന്റെ പേരിലാണ് ഒരു ഡോക്ടറെ സ്ഥലം മാറ്റിയതെന്നും ആരോപണമുയര്‍ന്നിരുന്നു. ഒരു ഘട്ടത്തില്‍ ഡോക്ടര്‍മാര്‍ പരസ്യ പ്രതിഷേധത്തിലേക്ക് വരുമെന്ന സ്ഥിതി വന്നെങ്കിലും പ്രത്യേക സാഹചര്യത്തില്‍ പ്രതിഷേധമൊഴിവാക്കി അധികൃതര്‍ക്ക് പരാതി നല്‍കുകയായിരുന്നു. 

സംഭവം വിവാദമായതോടെ ഡോക്ടറെ മുഴുവന്‍ ചുമതലയില്‍ നിന്നും ജില്ലാ കലക്ടര്‍ ഇടപെട്ട് മാറ്റി. അതേസമയം, ഹോം ക്വാറന്റൈന്‍ നിര്‍ദേശം ലംഘിച്ചെന്ന് കാണിച്ച് രാത്രിയോടെ മാനന്തവാടി പൊലിസ് ഇയാള്‍ക്കെതിരേ കേസ് രജിസ്റ്റര്‍ ചെയ്തു.