ന്യൂഡല്‍ഹി: കൊവിഡ്-19 ബാധയെത്തുടര്‍ന്ന് ഇറാനിലെ ഖുമ്മില്‍ കുടുങ്ങിയ 850 ഇന്ത്യന്‍ തീര്‍ഥാടകരെ തിരിച്ചെത്തിക്കണമെന്നാവശ്യപ്പെട്ടുള്ള ഹരജിയില്‍ സുപ്രിംകോടതി കേന്ദ്രസര്‍ക്കാറിന് നോട്ടിസയച്ചു. 

ജസ്റ്റിസുമാരായ ഡി.വൈ ചന്ദ്രചൂഡ്, സൂര്യകാന്ത് എന്നിവരടങ്ങുന്ന ബെഞ്ചിന്റേതാണ് നടപടി. വിഡിയോ കോണ്‍ഫറന്‍സിലൂടെയാണ് കോടതി കേസ് പരിഗണിച്ചത്. 

ഖുമ്മില്‍ കുടുങ്ങിയവര്‍ സാധാരണക്കാരായ തീര്‍ഥാടകരാണെന്ന് ഹരജിക്കാര്‍ക്ക് വേണ്ടി ഹാജരായ മുതിര്‍ന്ന അഭിഭാഷകന്‍ സഞ്ജയ് ഹെഗ്‌ഡെ ചൂണ്ടിക്കാട്ടി. 

ഈ മാസം ആദ്യത്തില്‍ തിരിച്ചെത്തും വിധമാണ് യാത്ര ക്രമീകരിച്ചിരുന്നത്. എന്നാല്‍ കൊവിഡ് കാരണം അവിടെ തുടരേണ്ടി വന്നത് ഇവരെ കടുത്ത പ്രയാസത്തിലാക്കിയിട്ടുണ്ടെന്നും ഹെഗ്‌ഡെ പറഞ്ഞു. 

2019 ഡിസംബറില്‍ മൂന്നു മാസത്തേക്ക് യാത്ര തിരിച്ചവരാണ് അവരില്‍ ഭൂരിഭാഗവും. മിക്കവരുടെയും കൈയില്‍ പണമില്ലാതായിരിക്കുന്നു. നാട്ടുകാരുടെ സഹായത്തിലാണ് അവര്‍ കഴിയുന്നത്. ഇന്ത്യയില്‍ തിരിച്ചെത്തിച്ചാല്‍ മാത്രമേ അവര്‍ക്ക് ശരിയായ ആരോഗ്യ പരിരക്ഷ ഉറപ്പാക്കാന്‍ കഴിയൂ. 

200 പേര്‍ അവിടെ ഒരു ഹോട്ടലിലാണ് താമസിക്കുന്നത്. നാലോ അഞ്ചോ പേര്‍ ഒരു മുറിയില്‍ തിങ്ങിക്കഴിയുകയാണ്. ഇത് കടുത്ത രോഗഭീഷണിയുയര്‍ത്തുന്നതും ലോകാരോഗ്യ സംഘടനയുടെ നിര്‍ദേശങ്ങള്‍ക്ക് വിരുദ്ധവുമാണെന്നും ഹരജിയില്‍ ചൂണ്ടിക്കാട്ടുന്നു.