തൊടുപുഴ: മൂന്നര കിലോ കഞ്ചാവുമായി രണ്ട് യുവതികളടക്കം നാലുപേര്‍ പീരുമേട് എക്‌സൈസ് സംഘത്തിന്റെ പിടിയിലായി. ആലപ്പുഴ സ്വദേശികളായ മണ്ണഞ്ചേരി വെളിയില്‍ ഷെഫീഖ് (32), പുതുവല്‍വേലി അനൂപ് അഷറഫ് (31), കണ്ണൂര്‍ തളിപ്പറമ്പ് സ്വദേശിനി പുഴക്കുളങ്ങരയില്‍ ജംസീന (28), കോഴിക്കോട് സ്വദേശിനി ഷീബ (30) എന്നിവരാണ് പിടിയിലായത്. ഇവര്‍ സഞ്ചരിച്ചിരുന്ന മാരുതി സിഫ്റ്റ് കാറും കസ്റ്റഡിയില്‍ എടുത്തിട്ടുണ്ട്.
കുമളി ചെക്ക് പോസ്റ്റില്‍ വാഹന പരിശോധന നടത്തുന്ന എക്‌സൈസ് ഉദ്യോഗസ്ഥരെ വെട്ടിച്ച് കടന്നുകളഞ്ഞ സംഘത്തെ പിന്തുടര്‍ന്ന് പിടികൂടുകയായിരുന്നു.
തമിഴ്‌നാട്ടിലെ കമ്പത്തു നിന്നുമാണ് ഇവര്‍ കഞ്ചാവ് വാങ്ങിയത്. മറ്റ് കഞ്ചാവു കേസുകളില്‍ ഇവര്‍ പ്രതികളാണോ എന്നും അന്വേഷിക്കുന്നുണ്ട്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.