മാഹി: ജപ്പാന്‍ ജ്വരം ബാധിച്ച് ഒരു സ്ത്രീ മരിച്ചതിന്റെ പശ്ചാത്തലത്തില്‍ അഴിയൂരില്‍ കൊതുകുകളെ കണ്ടെത്തി നശിപ്പിക്കാന്‍ തീരുമാനം. തിരുവനന്തപുരം ആരോഗ്യ വകുപ്പിന്റെ കീഴിലെ എന്റമോളജി വിഭാഗം സോണല്‍ ഓഫിസര്‍ അജ്ജു വിശ്വനാഥിന്റെ നേതൃത്വത്തിലുള്ള സംഘം കഴിഞ്ഞദിവസം കിണറുകളില്‍ പരിശോധന നടത്തിയിരുന്നു. പ്രവര്‍ത്തനം ഊര്‍ജിതമാക്കാന്‍ ജനപ്രതിനിധികളും ആരോഗ്യപ്രവര്‍ത്തകരും യോഗം ചേര്‍ന്ന് പ്രത്യേക സ്‌ക്വാഡുകള്‍ രൂപീകരിച്ചിട്ടുണ്ട്. ഇന്ന് അഴിയൂര്‍ ഹാര്‍ബര്‍ പരിസരം ശുചീകരിക്കും.
കുടിനീര്‍ തെളിനീര്‍ പദ്ധതിയുടെ ഭാഗമായി പ്രദേശത്തെ മുഴുവന്‍ കിണറുകളും കിറ്റ് ഉപയോഗിച്ച് പരിശോധിച്ച് ശുദ്ധജലമാണെന്ന് ഉറപ്പുവരുത്തും. ദേശീയപാതയില്‍ മാലിന്യം തള്ളുന്നത് തടയാന്‍ രാത്രികാല പട്രോളിങ്, മുഴുവന്‍ വാര്‍ഡുകളിലും ഫോഗിങ്, സന്നദ്ധ സംഘടനകള്‍ ചേര്‍ന്ന് മരിച്ച സ്ത്രീയുടെ സമീപത്തെ 200ഓളം വീടുകളില്‍ ബോധവല്‍ക്കരണം എന്നിവ നടത്തും. ഹരിത പ്രോട്ടോകോള്‍ കര്‍ശനമായി നടപ്പാക്കാനും അഴിയൂര്‍ പഞ്ചായത്ത് സെക്രട്ടറി ടി. ഷാഹുല്‍ ഹമീദിന്റെ നേതൃത്വത്തില്‍ ചേര്‍ന്ന യോഗം തീരുമാനിച്ചു.