മണ്ണാര്‍ക്കാട്: സ്‌കൂള്‍ ബസ് കൊക്കയിലേക്ക് മറിഞ്ഞ് ഒരു വിദ്യാര്‍ഥിക്ക് പരുക്ക്. ബസിലുണ്ടായിരുന്ന മറ്റുവിദ്യാര്‍ഥികള്‍ പരുക്കേല്‍ക്കാതെ അല്‍ഭുതകരമായി രക്ഷപ്പെട്ടു. കുളപ്പാടം ഒഴുകുപാറ ചിറക്കല്‍ വീട്ടില്‍ രാമദാസന്റെ മകളും സെന്‍ട്രല്‍ സ്‌കൂള്‍ അഞ്ചാം തരം വിദ്യാര്‍ഥിനിയുമായ അമൃത (11) ക്കാണ് പരുക്കേറ്റത്.
കാലിന് സാരമായി പരുക്കേറ്റ അമൃതയെ വട്ടമ്പലത്തെ സ്വകാര്യ ആശുപത്രിയില്‍ എത്തിച്ച് അടിയന്തിര സര്‍ജറി നടത്തി. ബസിലുണ്ടായിരുന്ന ശേഷിക്കുന്ന വിദ്യാര്‍ഥികളെയും വട്ടമ്പലത്തെ സ്വകാര്യ ആശുപത്രിയിലെത്തിച്ച് പരിശോധിച്ച് വിട്ടയച്ചു.
വട്ടമ്പലം-തോട്ടര-എം.എല്‍.എ റോഡില്‍ കുളപ്പാടം പൂന്തുരിത്തിക്ക് സമീപം ഇന്നലെ രാവിലെ 9:15 ഓടെയാണ് സംഭവം. കോട്ടപ്പുറം സെന്‍ട്രല്‍ ഇംഗ്ലീഷ് മീഡിയം സ്‌കൂളിന്റെ മിനി ബസാണ് പൂന്തുരുത്തിയിലെ കയറ്റം കയറുന്നതിനിടെ പിന്നോട്ട് നീങ്ങി കൊക്കയിലേക്ക് മറിഞ്ഞത്. കാലപ്പഴക്കം മൂലം കയറ്റം കയറുകയായിരുന്ന ബസിന്റെ പിന്‍ഭാഗത്തെ ആക്‌സില്‍ പൊട്ടിയതാണ് അപകടത്തിന് കാരണമെന്നാണ് പറയപ്പെടുന്നത്.
നൂറോളം മീറ്റര്‍ പിന്നോട്ട് നീങ്ങിയ ബസ് പിന്നീട് റോഡരികിലെ കൊക്കയിലേക്ക് മറിയുകയായിരുന്നു. ഓടികൂടിയ പ്രദേശവാസികളാണ് ബസിനകത്ത് കുടുങ്ങിയ വിദ്യാര്‍ഥികളെ പുറത്തെടുക്കുന്നതിനും ആശുപത്രിയില്‍ എത്തിക്കുന്നതിനും നേതൃത്വം നല്‍കിയത്.
വട്ടമ്പലത്ത് നിന്ന് ഫയര്‍ഫോഴ്‌സും സ്ഥലത്തെത്തിയിരുന്നു. 18 വിദ്യാര്‍ഥികളും ഒരു അധ്യാപികയും ക്ലീനറും ഡ്രൈവറുമടക്കം 21 പേരാണ് ബസിലുണ്ടായിരുന്നത്. മണ്ണാര്‍ക്കാട് ട്രാഫിക് പൊലിസും, മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരും സ്ഥലത്തെത്തി പരിശോധന നടത്തി.