ന്യൂഡല്‍ഹി: കോണ്‍ഗ്രസ് പ്രവര്‍ത്തനശൈലിയില്‍ ഭാവിയിലും മാറ്റങ്ങള്‍ വരുത്തിയില്ലെങ്കില്‍ ചെങ്ങന്നൂര്‍ ആവര്‍ത്തിക്കുമെന്ന് കെ. മുരളീധരന്‍. തിരുത്തലുകള്‍ വരുത്തി മുന്നോട്ടുപോകാന്‍ സംസ്ഥാന നേതൃത്വം തയാറാകണമെന്നും ചെങ്ങന്നൂരിലെ പ്രചാരണത്തില്‍ വീഴ്ചയുണ്ടായെന്നും മുരളീധരന്‍ തുറന്നടിച്ചു.
ന്യൂനപക്ഷങ്ങള്‍ക്ക് കോണ്‍ഗ്രസിലുള്ള വിശ്വാസം നഷ്ടപ്പെട്ടതിന്റെ തെളിവാണ് തോല്‍വി. വിവിധ സമുദായങ്ങളും കോണ്‍ഗ്രസിനെ കൈവിട്ടു. ന്യൂനപക്ഷങ്ങളുടെ നഷ്ടപ്പെട്ട വിശ്വാസ്യത വീണ്ടെടുക്കാനുള്ള ശ്രമമാണ് ഉണ്ടാകേണ്ടതെന്നും അദ്ദേഹം ഡല്‍ഹിയില്‍ പറഞ്ഞു. കേരളത്തിന്റെ ചുമതലയുള്ള എ.ഐ.സി.സി ജന. സെക്രട്ടറി മുകുള്‍ വാസ്‌നിക്കുമൊന്നിച്ച് ചൈന സന്ദര്‍ശനം നടത്തി തിരിച്ചുവന്ന മുരളീധരന്‍ ഡല്‍ഹിയില്‍ മാധ്യമപ്രവര്‍ത്തകരുമായി സംസാരിക്കുകയായിരുന്നു.
കോണ്‍ഗ്രസ് സംഘടനാപരമായി തകര്‍ന്നതിന്റെ ഫലമാണ് ചെങ്ങന്നൂരിലെ തോല്‍വി. നാല്‍പ്പത് ശതമാനം ബൂത്ത് കമ്മിറ്റികളും നിര്‍ജീവമാണ്.
മേല്‍ത്തട്ടിലെ പുന:സംഘടനയല്ല താഴെത്തട്ടില്‍ തെരഞ്ഞെടുപ്പ് നടത്തി ബൂത്ത് കമ്മിറ്റികള്‍ പുന:സംഘടിപ്പിക്കുകയാണ് വേണ്ടത്. ഇത്തം പ്രവര്‍ത്തനശൈലി തുടര്‍ന്നാല്‍ കനത്ത തോല്‍വി ഏറ്റുവാങ്ങേണ്ടിവരുമെന്നും മുരളീധരന്‍ മുന്നറിയിപ്പ് നല്‍കി.
ഒരു തെരഞ്ഞെടുപ്പിലും താന്‍ സ്വന്തം ബൂത്തില്‍ പിന്നിലായിട്ടില്ലെന്നും ചെങ്ങന്നൂര്‍ ഉപതെരഞ്ഞെടുപ്പില്‍ പ്രതിപക്ഷ നേതാവ് രമേശ് ചെന്നിത്തലയുടെ ബൂത്തില്‍ കോണ്‍ഗ്രസിന് ലീഡ് നഷ്ടമായതിനെ പരോക്ഷമായി സൂചിപ്പിച്ച് അദ്ദേഹം പറഞ്ഞു.
കെ.പി.സി.സി പ്രസിഡന്റ് സ്ഥാനത്തേക്ക് തന്നെ പരിഗണിക്കണമെന്ന് ആവശ്യപ്പെടില്ല. ജനങ്ങള്‍ക്കിടയില്‍ വേരോട്ടമുള്ള നേതാക്കളെ പരിഗണിക്കുകയും അവരുടെ അഭിപ്രായങ്ങള്‍ മുഖവിലയ്‌ക്കെടുക്കുകയുമാണ് ആവശ്യമെന്നും അദ്ദേഹം പറഞ്ഞു.