ലഖ്‌നൗ: ഉത്തര്‍പ്രദേശിലെ മഹോബയ്ക്കടുത്ത് ട്രെയിന്‍ പാളംതെറ്റി 52 പേര്‍ക്ക് പരുക്കേറ്റു. ഇവരില്‍ 10 പേരുടെ നില ഗുരുതരമാണെന്ന് പൊലിസ് അറിയിച്ചു. ജബല്‍പൂര്‍-നിസാമുദ്ദീന്‍ മഹാകൗശല്‍ എക്‌സ്പ്രസിന്റെ എട്ട് ബോഗികളാണ് പാളംതെറ്റിയത്. ഇതില്‍ മൂന്നെണ്ണം എ.സി കംപാര്‍ട്ടുമെന്റുകളും മൂന്നെണ്ണം ജനറല്‍ കംപാര്‍ട്ടുമെന്റുകളുമാണ്. മഹോബക്കും കുല്‍പാഹദിനും ഇടയില്‍ സുപാ ഗ്രാമത്തില്‍വച്ചാണ് ട്രെയിന്‍ പാളംതെറ്റിയത്.
അപകടം നടന്ന ഉടന്‍ 30 ഡോക്ടര്‍മാരെ എത്തിക്കുകയും പരുക്കേറ്റ യാത്രക്കാര്‍ക്ക് പ്രാഥമിക ചികിത്സ നല്‍കിയ ശേഷം വിദഗ്ധ ചികിത്സക്കായി ആശുപത്രിയിലേക്കു മാറ്റുകയും ചെയ്തതായും പൊലിസ്.
യു.പി ആരോഗ്യ മന്ത്രി സിദ്ധാര്‍ഥ് നാഥ് സിങ് ക്യാംപ് ചെയ്താണ് രക്ഷാപ്രവര്‍ത്തനം ഏകോപിപിച്ചത്. അപകടം നടന്ന സ്ഥലത്ത് റെയില്‍വേയുടെ ഉന്നത ഉദ്യോഗസ്ഥര്‍ എത്തി സ്ഥിതിഗതികള്‍ വിലയിരുത്തി. അപകടകാരണത്തെക്കുറിച്ച് ഉന്നതതല അന്വേഷണത്തിന് ഉത്തരവിട്ടിട്ടുണ്ട്.