തിരുവനന്തപുരം: നിര്‍മാണപ്രവര്‍ത്തനങ്ങള്‍ക്ക് കുടിവെള്ളമോ ശുദ്ധജലസ്രോതസുകളോ ഉപയോഗിക്കുന്നതിനെതിരെ കര്‍ശന നടപടി സ്വീകരിക്കുമെന്ന് ജില്ലാ കലക്ടര്‍ എസ്. വെങ്കടേസപതി പറഞ്ഞു.
കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന വരള്‍ച്ചാ ദുരിതാശ്വാസ പ്രവര്‍ത്തനങ്ങളുടെ അവലോകനയോഗത്തിലാണ് കലക്ടര്‍ ഇക്കാര്യം അറിയിച്ചത്. നിര്‍ദേശം ലംഘിച്ചാല്‍ വാഹനങ്ങള്‍ പിടിച്ചെടുക്കുന്നതടക്കമുള്ള ശിക്ഷാനടപടികള്‍ സ്വീകരിക്കും. സംഭരണികളിലെ ജലനിരപ്പ് അനുസരിച്ച് അടുത്ത അഞ്ചാഴ്ചക്കാലം നഗരത്തില്‍ കുടിവെള്ള പ്രശ്‌നങ്ങള്‍ ഉണ്ടാകാനിടയില്ലെന്ന് ജലവിഭവ വകുപ്പ് അധികൃതര്‍ അറിയിച്ചു. മറ്റിടങ്ങളില്‍ രണ്ടാഴ്ചക്കാലത്തേയ്ക്കുള്ള ജലലഭ്യതയും അധികൃതര്‍ ഉറപ്പുവരുത്തി. ഭൂഗര്‍ഭ ജലനിരപ്പില്‍ നിലവില്‍ മാറ്റമില്ല. ജലദൗര്‍ലഭ്യമുള്ള ഇനിയും ടാങ്കുകള്‍ സ്ഥാപിച്ചിട്ടില്ലാത്ത സ്ഥലങ്ങള്‍ കണ്ടെത്തി അടിയന്തരമായി ടാങ്കുകള്‍ സ്ഥാപിക്കുന്നതിനുള്ള നടപടികള്‍ സ്വീകരിക്കുന്നതിനും യോഗത്തില്‍ തീരുമാനമായി. അടിയന്തരഘട്ടങ്ങളിലെ ജലലഭ്യത ഉറപ്പുവരുത്തുന്നതിനായി 18 ഓളം ക്വാറികള്‍ ഏറ്റെടുത്തതായും ബന്ധപ്പെട്ട ഉദ്യോഗസ്ഥര്‍ അറിയിച്ചു.