തിരുവനന്തപുരം: ഗുണ്ടാസംഘങ്ങള്‍ക്കും സാമൂഹിക വിരുദ്ധര്‍ക്കും ഗുരുതര കുറ്റകൃത്യങ്ങള്‍ നടത്തിയവര്‍ക്കും എതിരേയുള്ള പൊലിസ് നടപടിയില്‍ ഒരാഴ്ചയ്ക്കിടെ അകത്തായത് 1260 പേര്‍. തിരുവനന്തപുരം റേഞ്ചില്‍ 350 പേര്‍ പിടിയിലായപ്പോള്‍ കൊച്ചിയില്‍ 479 പേരും തൃശൂരില്‍ 267 പേരും കണ്ണൂരില്‍ 164 ക്രിമിനലുകളും പിടിയിലായി. ഏറ്റവും കൂടുതല്‍ പേര്‍ അറസ്റ്റിലായത് തിരുവനന്തപുരം സിറ്റിയിലാണ്. 250 പേരെയാണ് പിടികൂടിയത്. പത്തനംതിട്ടയിലാണ് കുറവ്. ഇവിടെ നാല് പേര്‍ മാത്രമാണ് അറസ്റ്റിലായത്. തിരുവനന്തപുരം റൂറല്‍ -41, കൊല്ലം സിറ്റി -6, കൊല്ലം റൂറല്‍ -49, ആലപ്പുഴ -75, കോട്ടയം -47, ഇടുക്കി -43, കൊച്ചി സിറ്റി -160, എറണാകുളം റൂറല്‍ -154, തൃശൂര്‍ സിറ്റി -57, തൃശൂര്‍ റൂറല്‍ -98, പാലക്കാട് -35, മലപ്പുറം -77, കോഴിക്കോട് സിറ്റി -28, കോഴിക്കോട് റൂറല്‍ -31, കണ്ണൂര്‍ -29, വയനാട് -21, കാസര്‍കോട് -55. 1233 കേസുകളാണ് പിടിയിലായവര്‍ക്കെതിരേ രജിസ്റ്റര്‍ ചെയ്തത്.
പോക്‌സോ ആക്ട് പ്രകാരം 67 പേര്‍ അറസ്റ്റിലായി. സ്ത്രീകള്‍ക്കെതിരേയുള്ള അതിക്രമങ്ങളുമായി ബന്ധപ്പെട്ട് 26 പേര്‍ അറസ്റ്റിലായി. അബ്കാരി ആക്ട്, ലഹരി വസ്തു വിപണന വിരുദ്ധ നിയമം, കള്ളനോട്ട്, അനധികൃത മണല്‍ ഖനനം, എക്‌സ്‌പ്ലോസീവ്‌സ് ആക്ട് തുടങ്ങിയവയുമായി ബന്ധപ്പെട്ട് 710 പേരും അറസ്റ്റിലായി. ഗുണ്ട-റൗഡി ലിസ്റ്റില്‍ പെട്ട് ഒളിവില്‍ കഴിയുന്നവര്‍ ഉള്‍പ്പെടെ 289 പേര്‍ അറസ്റ്റിലായി. കവര്‍ച്ച, മോഷണം, കൊള്ള തുടങ്ങിയവയുമായി ബന്ധപ്പെട്ട് 42 പേര്‍ പിടിയിലായി.