തിരുവനന്തപുരം: നടപ്പുസാമ്പത്തിക വര്‍ഷത്തില്‍ സംസ്ഥാനത്തിന്റെ വിവിധ ഭാഗങ്ങളിലുണ്ടായ കടലാക്രമണം നേരിടുന്നതിന് രണ്ടുകോടി രൂപയുടെ അടിയന്തര പ്രവൃത്തികള്‍ക്ക് അനുമതി നല്‍കിയിട്ടുണ്ടെന്ന് മന്ത്രി മാത്യു ടി. തോമസ് നിയമസഭയെ അറിയിച്ചു.
കേരളത്തിന്റെ മൊത്തം കടല്‍ തീരത്തിലെ 576 കി.മീറ്ററില്‍ 125 കി.മീ. നീളത്തില്‍ കടല്‍ഭിത്തിയ്ക്ക് പുനരുദ്ധാരണ ജോലികള്‍ ആവശ്യമാണ്. 23 കി.മീറ്റര്‍ കടല്‍ തീരം സംരക്ഷിക്കുന്നതിന് പുതിയ നിര്‍മാണങ്ങള്‍ ആവശ്യമുണ്ട്.
കടലാക്രമണം ഏറ്റവും രൂക്ഷമായ പ്രദേശങ്ങള്‍ തിരിച്ചറിഞ്ഞ് പ്രതിരോധത്തിന് ആവശ്യമായ എസ്റ്റിമേറ്റുകള്‍ തയാറാക്കി പ്രദേശങ്ങളുടെ ഫോട്ടോ സഹിതം അനുമതിക്കായി യുദ്ധകാലാടിസ്ഥാനത്തില്‍ നല്‍കുന്നതിന് എല്ലാ ഓഫിസര്‍മാര്‍ക്കും നിര്‍ദേശങ്ങള്‍ നല്‍കിയിട്ടുണ്ട്.
ഓഖി ദുരന്തത്തെ തുടര്‍ന്ന് തകര്‍ന്ന കടല്‍ഭിത്തിയുടെ പുനര്‍നിര്‍മാണത്തിനും അടിയന്തര പ്രവൃത്തികള്‍ക്കുമായി ഈവര്‍ഷം ജനുവരി മുതല്‍ എട്ട് കോടി രൂപയുടെ 37 പ്രവൃത്തികളും നടപ്പിലാക്കി വരുന്നതായും എ.എന്‍ ഷംസീര്‍ എം.എല്‍.എയുടെ ശ്രദ്ധക്ഷണിക്കലിന് മന്ത്രി മറുപടി പറഞ്ഞു.