ഗോവ: രാജ്യത്ത് ഭരണഘടന അപകടത്തിലാണെന്നും ജനങ്ങള്‍ അരക്ഷിതരാണെന്നും ഗോവന്‍ ആര്‍ച്ച് ബിഷപ്പ്. വികസനത്തിന്റെ പേരില്‍ മനുഷ്യാവകാശങ്ങള്‍ തകര്‍ക്കപ്പെടുകയാണെന്നും അദ്ദേഹം പറഞ്ഞു. സഭാവിശ്വാസികള്‍ക്കുള്ള കത്തിലാണ് ഗോവന്‍ ആര്‍ച്ച് ബിഷപ്പ് ഫിലിപ്പ് നേരി ഫെറാവോ ഇക്കാര്യങ്ങള്‍ സൂചിപ്പിച്ചത്.
കത്തോലിക്കാ സഭാവിശ്വാസികള്‍ രാഷ്ട്രീയത്തില്‍ സജീവമായി പങ്കാളികളാകണമെന്ന് ആര്‍ച്ച് ബിഷപ്പ് നിര്‍ദേശിച്ചു.രാജ്യത്തെ നിലവിലുള്ള അപകടകരമായ രാഷ്ട്രീയ സാഹചര്യത്തെ ചൂണ്ടിക്കാട്ടിയാണ് ബിഷപ്പിന്റെ ഇടയലേഖനം പുറത്തു വന്നിരിക്കുന്നത്. രാജ്യത്ത് അസ്വാസ്ഥ്യ ജനകമായ രാഷ്ട്രീയ സാഹചര്യമാണ് നിലവിലുള്ളതെന്ന് പറഞ്ഞ ഡല്‍ഹി ആര്‍ച്ച് ബിഷപ്പ് അനില്‍ കോട്ടോയുടെ പ്രസ്താവനയ്ക്കു പിന്നാലെയാണ് ഗോവ ആര്‍ച്ച് ബിഷപ്പിന്റെ പ്രസ്താവനയും.2019ലെ പൊതുതെരഞ്ഞെടുപ്പ് അടുത്ത സാഹചര്യത്തില്‍ ഭരണഘടനയെ സംരക്ഷിക്കുന്നതിന് കത്തോലിക്കര്‍ മുന്നിട്ടിറങ്ങണമെന്നാണ്് ഇടയലേഖനത്തിലെ മറ്റൊരു പ്രധാന നിര്‍ദേശം. ഭൂരിഭാഗം ജനങ്ങളും അരക്ഷിതാവസ്ഥയിലാണ് ജീവിക്കുന്നത്. നമ്മുടെ ഭരണഘടന ഏറ്റവും മികച്ചതാണ് അതിനെ സംരക്ഷിക്കാന്‍ പോരാടണം.ഇന്ത്യയില്‍ ഏകമുഖ സംസ്‌കാരം വളര്‍ത്താനാണ് ശ്രമം നടക്കുന്നതെന്നും കത്തില്‍ ബിഷപ്പ് ആരോപിച്ചു.
എന്തു ധരിക്കണമെന്നും എന്ത് കഴിക്കണമെന്നും എന്ത് കേള്‍ക്കണമെന്നും എങ്ങനെ പ്രാര്‍ഥിക്കണമെന്നും എങ്ങനെ ജീവിക്കണമെന്നും ഉള്ള നിര്‍ദേശങ്ങള്‍ ചിലര്‍ തന്നു കൊണ്ടിരിക്കുകയാണെന്നും ഇത് മനുഷ്യാവകാശത്തെയും ജനാധിപത്യത്തെയും ആക്രമിക്കുന്ന സാഹചര്യമാണെന്നും ബിഷപ്പ് പറഞ്ഞു.ജനസംഖ്യയുടെ 26 ശതമാനവും കത്തോലിക്കരായ ഗോവയിലാണ് ആര്‍ച്ച് ബിഷപ്പിന്റെ വിവാദ ഇടയലേഖനം എന്നത് ശ്രദ്ധേയമാണ്.