ഇരിട്ടി: അഖിലേന്ത്യാ മെഡിക്കല്‍ പ്രവേശന പരീക്ഷയില്‍ ജില്ലയില്‍ ഒന്നാം സ്ഥാനം നേടി പുന്നാട് സ്വദേശി അഭിജിത്തിന്. 13 ലക്ഷത്തോളം വിദ്യാര്‍ഥികള്‍ എഴുതിയ പരീക്ഷയില്‍ അഖിലേന്ത്യാതലത്തില്‍ 112ാം സ്ഥാനവും സംസ്ഥാന തലത്തില്‍ ഏഴാം സ്ഥാനവും കരസ്ഥമാക്കിയാണ് അഭിജിത്ത് കണ്ണൂരിന്റെ ഒന്നാമനായത്.
ഇരിട്ടി താലൂക്ക് ആശുപത്രിയില്‍നിന്ന് ഹെല്‍ത്ത് ഇന്‍സ്‌പെക്ടറായി വിരമിച്ച പുന്നാട് നന്ദനം ഹൗസില്‍ കെ. രാജന്‍- കെ. രജിത ദമ്പതികളുടെ രണ്ട് മക്കളില്‍ ഒന്നാമനാണ് അഭിജിത്ത്. പുന്നാട് എല്‍.പി സ്‌കൂളില്‍ പ്രാഥമിക വിദ്യാഭ്യാസത്തിനു ശേഷം പാനൂര്‍ ചെണ്ടയാട് നവോദയ വിദ്യാലയത്തിലാണ് തുടര്‍പഠനം പൂര്‍ത്തിയാക്കിയത്.
എസ്.എസ്.എല്‍.സിക്കും പ്ലസ് ടുവിനും മുഴുവന്‍ വിഷയങ്ങളിലും എ പ്ലസ് കരസ്ഥമാക്കിയാണ് കോട്ടയം പാല ബ്രില്യന്റ് എന്‍ട്രന്‍സ് കോച്ചിങ് സെന്ററില്‍ എത്തിയത്.
കഴിഞ്ഞ തവണ മെഡിക്കല്‍ പ്രവേശന പരീക്ഷയെഴുതിയെങ്കിലും 45000നു മുകളിലായിരുന്നു അഭിജിത്തിന്റെ സ്ഥാനം. എന്നാല്‍ നിരാശനായി പിന്തിരിയാതെ പഠിച്ചു പൊരുതിയാണ് അഭിജിത്ത് വിജയക്കുതിപ്പ് നടത്തിയത്. തിരുവനന്തപുരം മെഡി. കോളജിലോ സംസ്ഥാനത്തിന് പുറത്തോ പ്രവേശനം നേടണമെന്നാണ് ആഗ്രഹമെന്ന് അഭിജിത്ത് പറഞ്ഞു. ചാവശ്ശേരി ഗവ. ഹയര്‍ സെക്കന്‍ഡറി സ്‌കൂള്‍ പത്താം ക്ലാസ് വിദ്യാര്‍ഥി അഭിരാമിയാണ് സഹോദരി. അഭിജിത്തിനെ 'നന്‍മ എഡ്യൂക്കേഷണല്‍ ആന്റ് കള്‍ച്ചറല്‍ ചാരിറ്റബിള്‍ സൊസൈറ്റിയുടെ നേതൃത്വത്തില്‍ 16ന് അനുമോദിക്കും.