വണ്ടൂര്‍: ഡല്‍ഹി ജെ.എന്‍.യു വിദ്യാര്‍ഥിയായ നജീബ് അഹമദിനെ കാണാതായിട്ട് 150 ദിവസങ്ങള്‍ പിന്നിടുമ്പോഴും മൗനം പാലിക്കുന്ന ഫാസിസ്റ്റ് ഭരണകൂടത്തിന്റെ നടപടിയില്‍ പ്രതിഷേധിച്ച് എം.എസ്.എഫ് വണ്ടൂര്‍ നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ പെയിന്റ് ഇന്‍ പ്രൊട്ടസ്റ്റ് എന്ന പേരില്‍ വണ്ടൂര്‍ ടൗണില്‍ ഫാസിസത്തിനെതിരേ ചിത്രം വരച്ച് പ്രതിഷേധ പരിപാടി സംഘടിപ്പിച്ചു.
ആര്‍ട്ടിസ്റ്റ് മുക്താര്‍ ഉദിരംപൊയില്‍ നജീബിന്റെ കാരിക്കേച്ചര്‍ വരച്ച് ഉദ്ഘാടനം നിര്‍വ്വഹിച്ചു. നിയോജക മണ്ഡലം പ്രസിഡന്റ് അബ്ദു റഹ്മാന്‍ അഞ്ചച്ചവിടി അധ്യക്ഷനായി. നിയോജക മണ്ഡലം മുസ്‌ലിം ലീഗ് പ്രസിഡന്റ് കളത്തില്‍ കുഞ്ഞാപ്പു ഹാജി, മലപ്പുറം ജില്ല എം.എസ്.എഫ് ട്രഷറര്‍ നിസാജ് എടപ്പറ്റ, എം.എസ്.എഫ് നിയോജക മണ്ഡലം ജന:സെക്രട്ടറി വി.ഷബീബ് റഹ്മാന്‍, അസ്‌കര്‍ തുവ്വൂര്‍, സി.ടി ചെറി, എം.കെ നാസര്‍, സുഹൈര്‍ കേരള, സീതി സവാദ്, മുനവിര്‍ മാടമ്പം തുടങ്ങിയവര്‍ സംസാരിച്ചു.