റിയാദ്: സഊദിയുടെ ദേശീയ വിമാന കമ്പനിയായ സഊദിയില്‍ യാത്രകകര്‍ക്ക് സൗജന്യമായി ഇനി മുതല്‍ വാട്‌സ് ആപ്പും ഉപയോഗിക്കാം. നേരത്തെ പരീക്ഷണാടിസ്ഥാനത്തില്‍ ആഭ്യന്തര റൂട്ടില്‍ തുടങ്ങിയ സേവനമാണ് അന്താരാഷ്ട്ര യാത്രകളിലും സജീകരിക്കുന്നത്. ഒരുമാസം മുന്‍പാണ് പരീക്ഷണാടിസ്ഥാനത്തില്‍ തിരഞ്ഞെടുക്കപ്പെട്ട ചില ആഭ്യന്തര സര്‍വീസുകളില്‍ സേവനം നല്‍കിത്തുടങ്ങിയത്. ഇത് വിജയകരവും യാത്രക്കാര്‍ക്കിടയില്‍ സ്വീകാര്യതയും വര്‍ധിച്ചെന്നു കണ്ടതിനെ തുടര്‍ന്നാണ് വിദേശ സര്‍വ്വീസുകളിലടക്കം മുഴുവന്‍ സര്‍വ്വീസുകളിലും സേവനം നല്‍കാന്‍ സഊദിയ തീരുമാനിച്ചത്.

യാത്രികര്‍ വിമാനത്തില്‍ കയറി വാട്‌സ് ആപ്പ് തുറന്നാല്‍ തന്നെ വൈഫൈ സംവിധാനം വഴി ഓട്ടോമാറ്റിക് ആയി കണക്റ്റ് ആകുന്ന സംവിധാനമാണ് സജ്ജീകരിച്ചിരിക്കുന്നത്. ഇതോടെ മുഴു സമയം ഓണ്‍ലൈനിലായി ഇനി മുതല്‍ സഊദി എയര്‍ലൈന്‍സില്‍ ആകാശ യാത്ര ചെയ്യാനാകും.