ഭുവനേശ്വര്‍: കൊവിഡ് -19 വൈറസ് ബാധയെ നേരിടാന്‍ മാസ്‌ക് നിര്‍ബന്ധമാക്കാനുള്ള തയ്യാറെടുപ്പിലാണ് സംസ്ഥാനങ്ങള്‍. കര്‍ശന ശിക്ഷ ഉറപ്പാക്കുന്ന രീതിയില്‍ ഓര്‍ഡിനന്‍സ് ഇറക്കിയും ഉത്തരവുകളിറക്കിയും രോഗം പടരാതിരിക്കാന്‍ കര്‍ശന നിരീക്ഷണത്തിലേക്ക് കടന്നിരിക്കുകയാണ് ചില സംസ്ഥാന സര്‍ക്കാരുകള്‍.
മാസ്‌ക് ധരിക്കാതെ പുറത്തിറങ്ങുന്നവര്‍ക്ക് 200 രൂപ പിഴയീടാക്കാന്‍ അനുമതി നല്‍കുന്ന ഓര്‍ഡിനന്‍സാണ് ഇന്നലെ ഒഡിഷ സര്‍ക്കാര്‍ ഇറക്കിയത്. ഒരിക്കല്‍ പിഴ ഈടാക്കിയതിന് ശേഷം വീണ്ടും മാസ്‌ക് ഇല്ലാതെ പിടിക്കപ്പെട്ടാലും ഇതേതുക തന്നെ അടയ്‌ക്കേണ്ടി വരും. എന്നാല്‍, തുടര്‍ന്നും ഇത് ആവര്‍ത്തിക്കുകയാണെങ്കില്‍ പിഴ 500 രൂപ വരെ വര്‍ധിക്കുമെന്ന് ഒഡിഷ ചീഫ് സെക്രട്ടറി അസിത് കുമാര്‍ ത്രിപാഠി പറഞ്ഞു. കൊവിഡ് കേസുകള്‍ സംസ്ഥാനത്ത് വര്‍ധിക്കുന്നതിനാലും ജനങ്ങള്‍ മുന്‍കരുതല്‍ ഒന്നും സ്വീകരിക്കാതെ പുറത്തിറങ്ങുന്നത് ശ്രദ്ധയില്‍പ്പെട്ടതിനാലുമാണ് ഈ ഓര്‍ഡിനന്‍സ് കൊണ്ടു വന്നതെന്നാണ് സര്‍ക്കാര്‍ വിശദീകരണം. മാസ്‌ക് ധരിക്കാതെ പുറത്തിറങ്ങുന്നതിനെ ഇനി ഒരു കുറ്റകൃത്യമായി കാണാനാണ് തീരുമാനം.
അതേസമയം, പുറത്തിറങ്ങുന്നവര്‍ മാസ്‌ക് ധരിക്കാതിരുന്നാല്‍ പിഴയും ആറുമാസം തടവും നേരിടേണ്ടി വരുമെന്ന് ഡല്‍ഹി സര്‍ക്കാരും ഉത്തരവിറക്കി. ഇതിന് പിന്നാലെ മാസ്‌ക് ധരിക്കാതെ പുറത്തിറങ്ങിയ 32 പേര്‍ക്കെതിരേ പൊലിസ് കേസെടുത്തു. പുറത്തിറങ്ങുന്നവര്‍ കാറിലായാലും മാസ്‌ക് ധരിക്കണമെന്നാണ് ചീഫ് സെക്രട്ടറി വിജയദേവിന്റെ ഉത്തരവ്. ജോലി സ്ഥലത്തും ഓഫിസുകളിലും മീറ്റിങ്ങുകളിലും മാസ്‌ക് നിര്‍ബന്ധമാക്കിയിട്ടുണ്ട്. സ്റ്റാന്‍ഡേര്‍ഡ് മാസ്‌കുകളോ വീട്ടില്‍ തയാറാക്കുന്ന കഴുകി ഉപയോഗിക്കാവുന്ന മാസ്‌കുകളോ ധരിക്കാം. മാസ്‌ക് ധരിച്ച് പുറത്തിറങ്ങണമെന്ന് പഞ്ചാബ് സര്‍ക്കാരും ഉത്തരവിറക്കി. വൃത്തിയുള്ള തുണികൊണ്ട് മുഖം മറയ്ക്കാനും അനുവദിക്കും.
മുംബൈയാണ് ഈ നിര്‍ദ്ദേശം നല്‍കിയ മറ്റൊരു നഗരം. രോഗബാധിതരുടെ എണ്ണം കൂടിയതയോടെ പൂനെയും നാസിക്കും നാഗ്പൂരും മുഖാവരണം നിര്‍ബന്ധമാക്കി. ഉത്തര്‍പ്രദേശ്, മധ്യപ്രദേശ്, ചണ്ഡിഗഡ്, ജമ്മുകശ്മിര്‍ എന്നിവിടങ്ങളിലും പൊതു ഇടങ്ങളില്‍ മാസ്‌ക് നിര്‍ബന്ധമാണ്. സംസ്ഥാനത്തെ എല്ലാ നഗര മേഖലകളിലും കാര്‍ഷിക വിപണികളിലും മുഖാവരണം ധരിക്കണമെന്നാണ് രാജസ്ഥാന്‍ സര്‍ക്കാര്‍ നിര്‍ദേശിച്ചിട്ടുള്ളത്.