തിരുവനന്തപുരം: കെ.എസ്.ആര്‍.ടി.സി ജീവനക്കാര്‍ക്ക് വായ്പ നല്‍കിയില്ലെങ്കില്‍ എസ്.ബി.ഐയിലുള്ള കെ.എസ്.ആര്‍.ടി.സിയുടെ അക്കൗണ്ട് നിര്‍ത്തുമെന്ന് എം.ഡി ടോമിന്‍ തച്ചങ്കരി എസ്.ബി.ഐയ്ക്ക് കത്തു നല്‍കി.
ഒരാഴ്ചയ്ക്കകം തീരുമാനമറിയിക്കാമെന്നാണ് എസ.്ബി.ഐ നല്‍കിയിരിക്കുന്ന മറുപടി. മാസങ്ങളായി ശമ്പളം വൈകി ലഭിച്ചതിനെത്തുടര്‍ന്ന് ജീവനക്കാരുടെ വായ്പാ തിരിച്ചടവു മുടങ്ങിയിരുന്നു. ക്രിസില്‍ റേറ്റിങ്ങില്‍ കെ.എസ്.ആര്‍.ടി.സി ജീവനക്കാരുടെ സ്‌കോര്‍ കുറഞ്ഞതിനെത്തുടര്‍ന്നാണ് എസ്.ബി.ഐ, കെ.എസ്.ആര്‍.ടി.സി ജീവനക്കാര്‍ക്ക് നിയന്ത്രണം ഏര്‍പ്പെടുത്തിയത്. ജീവനക്കാരുമായി തച്ചങ്കരി നടത്തിയ കൂടിക്കാഴ്ചകളില്‍ അവര്‍ ഉന്നയിച്ച പ്രധാന പ്രശ്‌നങ്ങളിലൊന്നായിരുന്നു വായ്പ ലഭിക്കാനുള്ള പ്രയാസം. തുടര്‍ന്നാണ് തച്ചങ്കരി എസ്.ബി.ഐയെ സമീപിച്ചത്.പ്രതിവര്‍ഷം 2,000 കോടിയുടെ ഇടപാടാണ് കെ.എസ്.ആര്‍.ടി.സി, എസ്.ബി.ഐ വഴി നടത്തുന്നത്. ജീവനക്കാര്‍ക്ക് വായ്പ ലഭ്യമാക്കാന്‍ എസ്.ബി.ഐ നടപടിയെടുത്തില്ലെങ്കില്‍ അക്കൗണ്ട് കനറാ ബാങ്കിലേയ്ക്ക് മാറ്റാനാണ് എം.ഡിയുടെ തീരുമാനം. പൊതുമേഖലാ ബാങ്ക് ആണെന്നതിനു പുറമെ കെ.എസ്.ആര്‍.ടി.സിക്കു വായ്പ നല്‍കിയ കണ്‍സോര്‍ഷ്യത്തിലും കനറാ ബാങ്കുണ്ട്.