കൊണ്ടോട്ടി: നെടുമ്പാശ്ശേരിയിലെ 2018 ലെ ഹജ്ജ് ക്യാംപില്‍ താമസിച്ച് സൗജന്യ സേവനം ചെയ്യുന്നതിന്ന് താല്‍പര്യമുള്ളവരില്‍ നിന്ന് അപേക്ഷ ക്ഷണിച്ചു. നിശ്ചിത മാതൃകയിലുള്ള അപേക്ഷ, പാസ്‌പോര്‍ട്ട് സൈസ് ഫോട്ടോ സഹിതം ജൂണ്‍ 20-ന് മുന്‍പായി സംസ്ഥാന ഹജ്ജ് കമ്മിറ്റിക്ക് സമര്‍പ്പിക്കണം.
അപേക്ഷയുടെ മാതൃക സംസ്ഥാന ഹജ്ജ് കമ്മിറ്റിയുടെ വെബ്‌സൈറ്റില്‍ ലഭ്യമാണ്. അപേക്ഷാ ഫോമില്‍ ഒരു പാസ്‌പോര്‍ട്ട് സൈസ് ഫോട്ടോ പതിക്കുകയും മറ്റൊരു ഫോട്ടോയുടെ പുറകുവശം പേരും മൊബൈല്‍ ഫോണ്‍ നമ്പറും എഴുതി പ്ലാസ്റ്റിക്ക് കവറിലിട്ട് അടക്കം ചെയ്യേണ്ടതുമാണ്. കവറിന് പുറത്ത് 'ഹജ്ജ് ക്യാംപ് വളണ്ടിയര്‍' അപേക്ഷ എന്ന് രേഖപ്പെടുത്തണം. സ്ത്രീകള്‍ക്കും അപേക്ഷിക്കാവുന്നതാണ്.
നിശ്ചിത സമയത്തും മാതൃകയിലുമല്ലാതെ നല്‍കുന്ന അപേക്ഷ സ്വീകരിക്കില്ല. അപേക്ഷ സമര്‍പ്പിക്കാത്തവരെയും അഭിമുഖത്തില്‍ പങ്കെടുക്കാത്തവരേയും വളണ്ടിയര്‍മാരായി പരിഗണിക്കില്ല. എക്‌സിക്യൂട്ടീവ് ഓഫിസര്‍, കേരള സംസ്ഥാന ഹജ്ജ് കമ്മിറ്റി, ഹജ്ജ് ഹൗസ്, പി.ഒ. കലിക്കറ്റ് എയര്‍പോര്‍ട്ട്, മലപ്പുറം- 673647 എന്ന വിലാസത്തിലാണ് അപേക്ഷ അയക്കേണ്ടത്.