കോവളം: യന്ത്ര തകരാറിനെ തുടര്‍ന്ന് കടലിലകപ്പെട്ട മത്സ്യതൊഴിലാളികളെയും വള്ളവും കോസ്റ്റല്‍ പൊലിസ് രക്ഷപ്പെടുത്തി കരക്കെത്തിച്ചു.
ഇന്നലെ ഉച്ചയോടെ വിഴിഞ്ഞത്തുനിന്നും മത്സ്യ ബന്ധനത്തിന് പോയ ടൗണ്‍ഷിപ്പ് സ്വദേശികളായ ഷാഫി, ഫാറൂക്ക്, അഹമ്മദ് കണ്ണ് എന്നിവരാണ് വള്ളത്തിന്റെ എന്‍ഞ്ചിന്‍ തകരാറിലായതിനെ തുടര്‍ന്ന് കടലിലകപ്പെട്ടത്. വിഴിഞ്ഞം കോസ്റ്റല്‍ പൊലിീസിന്റെ പട്രോളിങ് ബോട്ടാണ് വൈകിട്ട് അഞ്ചോടെ തീരത്ത് നിന്നും രണ്ട് നോട്ടിക്കല്‍ മൈല്‍ അകലെ ഇവരെ കണ്ടെത്തി രക്ഷപ്പെടുത്തിയത്.
വിഴിഞ്ഞം കോസ്റ്റല്‍ പൊലിസ് എസ്.ഐ ഷാനിബാസിന്റെ നേതൃത്വത്തില്‍, ജയകുമാര്‍, രാജ് കുമാര്‍, സ്രാങ്ക് ജയകുമാര്‍, മറൈന്‍ ഗാര്‍ഡ് റോക്കി എന്നിവരടങ്ങിയ സംഘമാണ് രക്ഷാപ്രവര്‍ത്തനം നടത്തിയത്.