മണ്ണാര്‍ക്കാട്: കാരാകുറുശ്ശി വലിയട്ട പ്രദേശത്ത് ഇലവറക്കളം പാടശേഖരം പാടം നികത്തുന്നത് അധികൃതര്‍ തടഞ്ഞു. നാട്ടുകാരുടെ പരാതിയെ തുടര്‍ന്ന് മണ്ണാര്‍ക്കാട് റവന്യു സ്‌പെഷല്‍ സ്‌ക്വാഡ് സംഘമെത്തി മണ്ണെടുക്കുന്ന ജെ.സി.ബിയെയും ഡ്രൈവറെയും പിടികൂടി. പ്രദേശത്ത് വര്‍ഷങ്ങളായി പാടം നികത്തലും കുന്നിടിക്കലും സജീവമാണ്. വില്ലേജ് ഒഫിസിലും കൃഷി ഒഫിസിലും നിരന്തരം പരാതിപ്പെട്ടിട്ടും പരിഹാരമാകാത്തതിനാല്‍ 150ഓളം അംഗങ്ങള്‍ ഒപ്പിട്ട പരാതി നേരിട്ട് ജില്ലാ കലക്ടര്‍ക്ക് നല്‍കിയിരുന്നു. ഇതിന്റെ അന്വേഷണം നടക്കുന്നതിനിടെയാണ് വീണ്ടും കുന്നിടിക്കലും പാടം നികത്തലും തുടങ്ങിയത്. പാടശേഖരത്തിലെ നീരുറവ പുഴയിലേക്ക് ഒഴുക്കിവിടുന്നതിനാല്‍ വേനല്‍കാലത്ത് പ്രദേശത്ത് കുടിവെള്ളക്ഷാമം രൂക്ഷമാണെന്ന പരാതിയുമുണ്ട്. അധികൃതര്‍ ശക്തമായ നടപടിയെടുത്തില്ലെങ്കില്‍ പ്രദേശവാസികള്‍ പ്രക്ഷോഭ പരിപാടികള്‍ നടത്താനുളള തീരുമാനത്തിലാണ്.