കൊച്ചി: പി.ഡി.പി ചെയര്‍മാന്‍ അബ്ദുന്നാസര്‍ മഅ്ദനി നെടുമ്പാശ്ശേരി വിമാനത്താവളത്തിലെത്തി. ബംഗളൂരുവില്‍ നിന്ന് 7.25ന്റെ ഇന്‍ഡിഗോ വിമാനത്തില്‍ പുറപ്പെട്ട മഅ്ദനി 8.35ഓടെയാണ് നെടുമ്പാശ്ശേരിയിലെത്തിയത്. രോഗാവസ്ഥയിലായ മാതാവിനെ കാണാന്‍ എട്ടു ദിവസമാണ് കോടതി മഅ്ദനിക്ക് അനുവദിച്ചത്.
വ്യോമയാന മന്ത്രാലയത്തിന്റെ പ്രത്യേക അനുമതിയില്ലാതെ വിമാനത്തില്‍ കയറ്റില്ലെന്ന ഇന്‍ഡിഗോ എയര്‍ലൈന്‍സ് അധികൃതരുടെ നിലപാടിനെ തുടര്‍ന്നാണ് ഉച്ചയോടെ പുറപ്പെടേണ്ടിയിരുന്ന മഅ്ദനിയുടെ യാത്ര വൈകീട്ടത്തേക്ക് മാറ്റിവച്ചത്.

മഅ്ദനിയെ വിമാനത്തില്‍ കയറ്റാത്തതില്‍ പ്രതിഷേധിച്ച് ഇന്‍ഡിഗോ എയര്‍ലൈന്‍സിന്റെ ഓഫിസിനു മുന്‍പില്‍ പി.ഡി.പി പ്രവര്‍ത്തകര്‍ നടത്തിയ ധര്‍ണ അവസാനിപ്പിച്ചു. നേരത്തെ ധര്‍ണ സംഘര്‍ഷാവസ്ഥയിലേക്ക് നീങ്ങിയിരുന്നു. വിമാനത്താവളത്തില്‍ നിന്നും പ്രവര്‍ത്തകരെ ഒഴിപ്പിക്കാന്‍ പൊലിസ് ശ്രമിച്ചതോടെയാണ് സമരം സംഘര്‍ഷാവസ്ഥയിലേക്ക് നീങ്ങിയത്.

ബംഗളൂരുവിലെ പ്രത്യേക എന്‍.ഐ.എ കോടതി എട്ടുദിവസം കേരളത്തില്‍ തങ്ങാന്‍ അനുമതി നല്‍കിയതിന്റെ അടിസ്ഥാനത്തിലാണ് സന്ദര്‍ശനം. വിമാനത്താവളത്തില്‍ പി.ഡി.പി പ്രവര്‍ത്തകരുടെ നേതൃത്വത്തില്‍ ഉജ്ജ്വല സ്വീകരണം നല്‍കി. പിന്നീട് വാഹനങ്ങളുടെ അകമ്പടിയോടെ റോഡുമാര്‍ഗം അന്‍വാര്‍ശേരിയിലെത്തും. വീട്ടിലെത്തി മാതാവിനെ സന്ദര്‍ശിച്ച ശേഷം അന്‍വാര്‍ശേരിയില്‍ ക്യാംപ് ചെയ്യുമെന്ന് പി.ഡി.പി സംസ്ഥാന ജനറല്‍ സെക്രട്ടറി മുഹമ്മദ് റജീബ് പറഞ്ഞു.