തിരുവനന്തപുരം: സംസ്ഥാനത്ത് കൊവിഡ് പ്രതിസന്ധി പരിഹരിക്കാന്‍ സര്‍ക്കാര്‍ ജീവനക്കാരുടെ ആറു ദിവസത്തെ ശമ്പളം പിടിക്കാന്‍ മന്ത്രിസഭാ യോഗ തീരുമാനം.
അഞ്ചു മാസം വരേ ഈ രീതി തുടരുവാനും പിന്നീട് ഈ തുക ഇവര്‍ക്കു മടക്കിനല്‍കുമെന്നുമാണ് സര്‍ക്കാര്‍ വൃത്തങ്ങള്‍ പറയുന്നത്.
ഇതില്‍ എല്ലാ ജീവനക്കാരേയും ഉള്‍പ്പെടുത്തും. ആര്‍ക്കും ഇളവില്ല. ചെറിയ തസ്തികകളില്‍ ജോലി ചെയ്യുന്നവരുടേതടക്കം ആറുദിവസത്തെ ശമ്പളം പിടിക്കാന്‍ തന്നെയാണ് തീരുമാനം. സര്‍ക്കാര്‍ ജീവനക്കാരുടെ മാത്രമല്ല എം.എല്‍.എ മാരുടെയും മന്ത്രിമാരുടേയും ശമ്പളവും പിടിക്കും.

നേരത്തെ സാലറി ചലഞ്ചിനായിരുന്നു സര്‍ക്കാര്‍ ആലോചിച്ചിരുന്നത്. അതിനെതിരേ ശക്തമായ പ്രതിഷേധമുയര്‍ന്നതോടയാണ് തീരുമാനം വേണ്ടെന്നുവെച്ചത്. ധനമന്ത്രി ഡോ.തോമസ് ഐസക് തന്നെ പുതിയ മാര്‍ഗങ്ങള്‍ തേടുകയായിരുന്നു. അങ്ങനെയാണ് ധനവകുപ്പ് ആറു ദിവസത്തെ ശമ്പളം പിടിക്കാന്‍ പുതിയ നിര്‍ദേശം മുന്നോട്ടുവെച്ചത്. ആ നിര്‍ദേശത്തിന് മന്ത്രിസഭ അംഗീകാരം നല്‍കുകയായിരുന്നു.

പുതിയ സാഹചര്യത്തില്‍ സര്‍ക്കാരിനു മുമ്പില്‍ മറ്റു വഴികളില്ലെന്നാണ് ബന്ധപ്പെട്ട വൃത്തങ്ങള്‍ പറയുന്നത്.
പല സംസ്ഥാനങ്ങളിലും ജീവനക്കാരുടെ ശമ്പളം വെട്ടിക്കുറയ്ക്കുകയും മറ്റും ചെയ്തിരുന്നു. എന്നാല്‍ കേരളം അത്തരമൊരു തീരുമാനത്തിലേക്കു പോയിരുന്നില്ല. സര്‍ക്കാറിന്റെ എല്ലാ തരത്തലിലുമുള്ള വരുമാന സ്രോതസ് നിലച്ചിരിക്കുന്നു.

ജീവനക്കാര്‍ക്ക് ശമ്പളം തന്നെ എങ്ങനെ കൊടുക്കുമെന്ന ആശങ്കയുമുണ്ട്. ഈ അവസ്ഥയിലാണ് ആറു ദിവസത്തെ ശമ്പളം പിടിക്കാന്‍ ഇന്നു ചേര്‍ന്ന മന്ത്രിസഭായോഗം തീരുമാനിച്ചത്.
എങ്ങനെയൊക്കെയാണ് ഈക്കാര്യത്തില്‍ തീരുമാനം നടപ്പാക്കുക എന്നകാര്യത്തെക്കുറിച്ച് ഉത്തരവ് പുറത്തുവന്നെങ്കിലേ പറയാന്‍ കഴിയൂ. എന്നാല്‍ ഇക്കാര്യത്തില്‍ തീരുമാനം അറിഞ്ഞയുടനെ തന്നെ സര്‍ക്കാര്‍ ജീവനക്കാരും അവരുടെ സംഘടനകളും പ്രതിഷേധവുമായി രംഗത്തു വന്നിരിക്കുകയാണ്.