തിരുവനന്തപുരം: ലോക്ക്ഡൗണ്‍ ഇളവുകള്‍ മുതലെടുത്ത് അതിര്‍ത്തി പ്രദേശങ്ങളിലൂടെ ജനസഞ്ചാരം വ്യാപകമായതോടെ ഇളവുകള്‍ നിര്‍ത്തലാക്കി നിരീക്ഷണം ശക്തമാക്കാന്‍ സര്‍ക്കാര്‍ തീരുമാനം.
ഇന്നലെ കളിയിക്കാവിളയില്‍നിന്ന് അതിര്‍ത്തി കടന്ന് തിരുവനന്തപുരത്തെത്തിയ തമിഴ്‌നാട് സര്‍ക്കാര്‍ സര്‍വിസിലെ വനിതാ ഡോക്ടറെയും അവരുടെ ഭര്‍ത്താവായ കേരളത്തില്‍ സര്‍ക്കാര്‍ സര്‍വിസിലെ ഡോക്ടറെയും ക്വാറന്റൈന്‍ ചെയ്തു. ഇരുവര്‍ക്കുമെതിരേ കേസുമെടുത്തിട്ടുണ്ട്.
വിദേശത്തുനിന്നെത്തിയ കൊവിഡ് പോസിറ്റീവായ ഇടുക്കി സ്വദേശിനി ഡല്‍ഹി പൊലിസിന്റെ ജീപ്പ് മാര്‍ഗം നാട്ടിലെത്തിയതും തിരുവനന്തപുരത്തെ കേന്ദ്രീയ വിദ്യാലയ അധ്യാപിക എക്‌സൈസ് വാഹനത്തില്‍ വയനാട് വഴി അതിര്‍ത്തി കടക്കാന്‍ ശ്രമിക്കുകയും ചെയ്തത് നിയന്ത്രണങ്ങളുടെ ലംഘനമാണ്.
വാഹനങ്ങളില്‍ അതിര്‍ത്തി കടക്കാന്‍ ശ്രമിച്ച സംഭവത്തില്‍ കൊല്ലം തെന്മല പൊലിസ് സ്റ്റേഷന്‍ അതിര്‍ത്തിയില്‍ നാല് കേസുകള്‍ രജിസ്റ്റര്‍ ചെയ്തു. അഞ്ചുപേരെ അറസ്റ്റ് ചെയ്തിട്ടുണ്ട്.
അത്യാവശ്യങ്ങള്‍ക്കായി എത്തുന്നവരില്‍ പനിയോ രോഗലക്ഷണങ്ങളോ കണ്ടാല്‍ അവരെ ക്വാറന്റൈനിലാക്കാനും നിര്‍ദേശിച്ചിട്ടുണ്ട്.
മതിയായ കാരണമില്ലാതെ അതിര്‍ത്തി കടന്നുള്ള യാത്രകള്‍ അനുവദിക്കില്ല. ചരക്ക് വാഹനങ്ങളില്‍ ഡ്രൈവര്‍, ക്ലീനര്‍ എന്നിവരെ നിര്‍ബന്ധിത ആരോഗ്യപരിശോധനയ്ക്ക് വിധേയമാക്കണം. വാഹനങ്ങള്‍ അണുവിമുക്തമാക്കും. വനത്തിലൂടെയും തോട്ടങ്ങളിലൂടെയുമുള്ള ഊടുവഴികളിലും കര്‍ശന പരിശോധനയ്ക്ക് വനം, പൊലിസ് വകുപ്പുകള്‍ക്കും നിര്‍ദേശം നല്‍കി.
അതിര്‍ത്തികളില്‍ ഡ്രോണ്‍ ഉപയോഗിച്ച് നിരീക്ഷണം നടത്താന്‍ സംസ്ഥാന പൊലിസ് മേധാവി ലോക്‌നാഥ് ബെഹ്‌റ എല്ലാ ജില്ലാ പൊലിസ് മേധാവിമാര്‍ക്കും നിര്‍ദേശം നല്‍കി.
സംസ്ഥാന അതിര്‍ത്തികളിലെ ചെക് പോയിന്റുകളില്‍ പരിശോധന കൂടുതല്‍ കര്‍ക്കശമാക്കാനും നിര്‍ദേശിച്ചിട്ടുണ്ട്.
ഹോട്ട്‌സ്‌പോട്ട് ആയി പ്രഖ്യാപിച്ച സ്ഥലങ്ങളില്‍ നിലവിലുള്ള നിയന്ത്രണങ്ങളും പരിശോധനയും തുടരും. ജില്ലകളില്‍ മറ്റ് നിയന്ത്രണങ്ങള്‍ ഏര്‍പ്പെടുത്തുകയോ ഇളവു വരുത്തുകയോ ചെയ്യുന്നത് സംബന്ധിച്ച് ജില്ലാതല ദുരന്ത നിവാരണ അതോറിറ്റി തീരുമാനമെടുക്കും.