കൊല്‍ക്കത്ത: അടുത്ത സീസണില്‍ ഐ.എസ്.എല്‍ പ്രവേശനത്തിനൊരുങ്ങി ഐ ലീഗ് ക്ലബുകളായ ഈസ്റ്റ് ബംഗാളും പഞ്ചാബ് എഫ്.സിയും. അടുത്ത സീസണ്‍ മുതല്‍ ഐ.എസ്.എല്ലില്‍ 12 ടീമുകളുണ്ടെന്ന് നേരത്തെ അറിയിച്ചിരുന്നു. ഇതിനെ തുടര്‍ന്നാണ് രണ്ട് ടീമുകള്‍ ഐ.എസ്.എല്‍ പ്രവേശനം നേടാന്‍ ശ്രമിക്കുന്നത്. 

ഇരു ക്ലബുകളും ഐ.എസ്.എല്‍ പ്രവേശനം നേടുന്നതിനുള്ള പ്രാരംഭ നടപടികള്‍ ആരംഭിച്ചു എന്നാണ് റിപ്പോര്‍ട്ടുകള്‍. സീസണ്‍ അവസാനിച്ചതു മുതല്‍ മികച്ച താരങ്ങളെ ടീമിലെത്തിച്ച് പ്രവേശനത്തിനുള്ള ഒരുക്കങ്ങള്‍ ഈസ്റ്റ് ബംഗാള്‍ നേരത്തെ തന്നെ തുടങ്ങിയിരുന്നു. 

ഒരു മാസത്തിനുള്ളില്‍ തന്നെ പ്രധാനപ്പെട്ട എട്ടു താരങ്ങളെയാണ് ഈസ്റ്റ് ബംഗാള്‍ ടീമിലെത്തിച്ചത്. ഐ.എസ്.എല്‍ പ്രവേശനത്തിനുള്ള അപേക്ഷ ഉടന്‍ തന്നെ ഈസ്റ്റ് ബംഗാള്‍ അധികൃതര്‍ക്ക് കൈമാറുമെന്നാണു വിവരം. ഐ.എസ്.എല്‍ ക്ലബായ എ.ടി.കെയില്‍ മോഹന്‍ ബഗാന്‍ ലയിച്ചതോടെയാണ് കൊല്‍ക്കത്തയ്ക്കും ഐ.എസ്.എല്‍ മോഹമുദിച്ചത്. 

ഇതോടെ കൊല്‍ക്കത്തയിലെ രണ്ടു വമ്പന്‍മാരെയും അടുത്ത സീസണില്‍ ഐ.എസ്.എല്ലില്‍ പ്രതീക്ഷിക്കാം. ഐ.എസ്.എല്‍ പ്രവേശനം കാത്തുകിടക്കുന്ന ഈസ്റ്റ് ബംഗാളിനു പുതിയ സ്‌പോണ്‍സര്‍മാരെയും കണ്ടെത്താന്‍ സാധിക്കും. മൂന്നാഴ്ചയ്ക്കുള്ളില്‍ തന്നെ ഇക്കാര്യത്തില്‍ അന്തിമ തീരുമാനമുണ്ടാകുമെന്നാണ് റിപ്പോര്‍ട്ടുകള്‍. 

മിനര്‍വ പഞ്ചാബ് എന്ന പേര് മാറ്റി പഞ്ചാബ് എഫ്.സി എന്ന് പേരില്‍ അറിയുന്ന ടീം ഐ.എസ്.എല്‍ പ്രവേശനത്തിന് ശ്രമിക്കുന്നുണ്ടെന്നാണ് റിപ്പോര്‍ട്ടുകള്‍. 

ക്ലബ് ഇതിനുള്ള അപേക്ഷ നല്‍കുന്നതിനുള്ള നടപടികള്‍ ആരംഭിച്ചതായാണ് വിവരം. അവസാന സീസണില്‍ ഐ ലീഗില്‍ പട്ടികയില്‍ മൂന്നാം സ്ഥാനത്തായിരുന്നു പഞ്ചാബ് ഫിനിഷ് ചെയ്തത്. ഐ.എസ്.എല്‍ പ്രവേശനം നേടുന്നതിന് വേണ്ടി ടീമിനെ മികച്ചതാക്കുന്ന നടപടികളും പഞ്ചാബ് തുടങ്ങിയിട്ടുണ്ട്. ഇതിനായി സൂപ്പര്‍ താരങ്ങളുമായി പഞ്ചാബ് ചര്‍ച്ച നടത്തുന്നുണ്ടെന്നാണ് വിവരം.