തിരുവനന്തപുരം: കൊവിഡ് 19 പ്രതിരോധിക്കുന്നതിനായി രൂപീകരിച്ച ആയുര്‍ രക്ഷാ ക്ലിനിക്കുകള്‍ നിരീക്ഷിക്കുന്നതിന് മേഖലാ സമിതിയായി. സര്‍ക്കാര്‍ ആവിഷ്‌കരിച്ച നാല് പദ്ധതികള്‍ ജില്ലാതലത്തില്‍ നടപ്പിലാക്കുന്നത് നിരീക്ഷിക്കുന്നതിനാണ് ദക്ഷിണ മേഖലാ സമിതി രൂപീകരിച്ച് പ്രവര്‍ത്തനം ആരംഭിച്ചത്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലെ പ്രവര്‍ത്തനങ്ങള്‍ ഏകോപിപ്പിക്കുന്നതിനും സ്വകാര്യ ഡോക്ടര്‍മാര്‍, കോളജ് വിദ്യാര്‍ഥികള്‍, സന്നദ്ധപ്രവര്‍ത്തകര്‍ തുടങ്ങിയവര്‍ക്ക് കൊവിഡ് 19 പ്രതിരോധം സംബന്ധിച്ച് ട്രെയിനിങ് നല്‍കുന്നതിനും പദ്ധതിനിര്‍വഹണത്തിനും ഡാറ്റാ കലക്ഷനും ആവശ്യമായ സാഹചര്യം ഒരുക്കുന്നതിനുമാണ് മേഖലാ സമിതി.
തിരുവനന്തപുരം ആയുര്‍വേദ കോളജ് ആര്‍.എം.ഒ ഡോ. എസ്. ഗോപകുമാര്‍ ചെയര്‍മാനും ഭാരതീയ ചികിത്സാ വകുപ്പ് ജോ. ഡയരക്ടര്‍ ഡോ. ആര്‍. അനില്‍കുമാര്‍ കോഓഡിനേറ്ററുമായി പ്രവര്‍ത്തിക്കും.