പൂഞ്ഞാര്‍: കൈപ്പള്ളി റോഡില്‍ ഇടമല എസ് വളവില്‍ സാമൂഹിക വിരുദ്ധര്‍ അറവുശാലാ മാലിന്യങ്ങള്‍ തള്ളി. കഴിഞ്ഞ ദിവസം രാത്രിയാണ് 20 ലേറെ ചാക്ക് മാലിന്യങ്ങള്‍ റോഡ് സൈഡില്‍ തള്ളിയത്.
കോഴിക്കടകളില്‍ നിന്നും അറവുശാലകളില്‍ നിന്നുമുള്ള ഇറച്ചി മാലിന്യങ്ങളാണ് തള്ളിയിരിക്കുന്നത്.
പ്രദേശത്ത് പലഭാഗത്തും ചാക്കുകളില്‍ മാലിന്യം നിക്ഷേപിക്കുന്ന പതിവുണ്ടെങ്കിലും ഇത്രയും കൂടുതല്‍ മാലിന്യങ്ങള്‍ തള്ളുന്നത് ആദ്യമായാണ്. മഴ പെയ്താല്‍ ഇവ റോഡിലൂടെ നിന്ന് മീനച്ചിലാറ്റിലുമെത്തും. രൂക്ഷമായ ദുര്‍ഗന്ധം മൂലം വാഹനത്തില്‍ പോലും പോകാന്‍ പറ്റാത്ത അവസ്ഥയാണുള്ളത്. ആള്‍ത്താമസം കുറവായ പ്രദേശം തിരഞ്ഞെടുത്താണ് മാലിന്യം നിക്ഷേപിച്ചിരിക്കുന്നത്.
ഗ്രാമപഞ്ചായത്ത് പ്രസിഡന്റ് ഷൈനി സന്തോഷ്, ബ്ലോക്ക് പഞ്ചായത്തംഗം ആനിയമ്മ സണ്ണി, ഗ്രാമപഞ്ചായത്തംഗം സജി, സിബി എന്നിവരുടെ നേതൃത്വത്തില്‍  നാട്ടുകാര്‍ മാലിന്യം കുഴിച്ചുമൂടി. പ്രദേശത്ത് രാത്രികാല പൊലിസ് പരിശോധനകള്‍ കര്‍ശനമക്കണമെന്നും പഞ്ചായത്ത് ആവശ്യപ്പെട്ടു. തുടര്‍ച്ചയായുണ്ടാകുന്ന മാലിന്യ നിക്ഷേപത്തിനെതിരേ ജനകീയ സമിതികളുണ്ടാക്കി രാത്രി പരിശോധനകള്‍ നടത്താനും തീരുമാനിച്ചു.