തിരുവനന്തപുരം: ജില്ലാ ഫുട്‌ബോള്‍ അസോസിയേഷന്റെ നേതൃത്വത്തില്‍ നടത്തിയ ജില്ലാ ഫുട്‌ബോള്‍ ലീഗില്‍ ഏജീസ് തിരുവനന്തപുരം ചാംപ്യന്‍മാര്‍. ഒന്നിനെതിരേ രണ്ടു ഗോളുകള്‍ക്ക് എസ്.ബി.ഐ തിരുവനന്തപുരത്തെ പരാജയപ്പെടുത്തിയാണ് ഏജീസ് ലീഗ് ചാംപ്യന്‍പട്ടം സ്വന്തമാക്കിയത്. ചന്ദ്രശേഖരന്‍നായര്‍ സ്റ്റേഡിയത്തില്‍ നടന്ന കലാശപ്പോരാട്ടത്തില്‍ ആദ്യപകുതിയില്‍ എസ്.ബി.ഐ ആയിരുന്നു ഒരു ഗോളിനു മുന്നിട്ടു നിന്നത്. എസ്.ബി.ഐക്കു വേണ്ടി ഷിബിന്‍ലാല്‍ ആണ് ഗോള്‍ നേടിയത്. എന്നാല്‍ രണ്ടാം പകുതിയില്‍ മിന്നും പ്രകടനം നടത്തി ഏജീസ് മത്സരത്തിലേക്ക് തിരിച്ചു വന്നു. രണ്ടാം പകുതിയുടെ അഞ്ചാം മിനുട്ടില്‍ കണ്ണന്റെ ഗോളോടെ ഏജീസ് സമനില പിടിച്ചു. 60-ാം മിനുട്ടില്‍ ജസ്റ്റിന്‍ ഏജീസിനു വിജയഗോള്‍ സമ്മാനിച്ചു. മത്സം ഇടയ്ക്ക് പരുക്കനായി മാറിയതോടെ ഇരുടീമംഗങ്ങളും തമ്മില്‍ കൈയാങ്കളിയും നടന്നു. ഇതോടെ അല്‍പസമയത്തേക്ക് മത്സരം നിര്‍ത്തി വെയ്‌ക്കേണ്ടിയും വന്നു.