കണ്ണൂര്‍: ജില്ലയില്‍ സി.പി.എമ്മിന് അനഭിമതരായ നാലു എസ്.ഐമാരെ സ്ഥലംമാറ്റി. തിരുവനന്തപുരം, എറണാകുളം ജില്ലയിലേക്കാണ് സ്ഥലംമാറ്റം. തലശ്ശേരി പ്രിന്‍സിപ്പല്‍ എസ്.ഐ ഷാജു, കൊളവല്ലൂര്‍ എസ്.ഐ കെ. ഷിജു, കണ്ണൂര്‍ ട്രാഫിക് എസ്.ഐ സുധാകരന്‍, കതിരൂര്‍ എസ്.ഐ സുരേന്ദ്രന്‍ കല്യാടന്‍ എന്നിവരെയാണ് സ്ഥലംമാറ്റിയത്.
ഷാജുവിനെയും ഷിജുവിനെയും എറണാകുളം റെയ്ഞ്ചിലേക്കും സുധാകരനെയും സുരേന്ദ്രനെയും തിരുവനന്തപുരം റെയ്ഞ്ചിലേക്കുമാണ് മാറ്റിയത്. തലശേരി കുട്ടിമാക്കൂലില്‍ ദലിത് യുവതികള്‍ ജയിലിലടക്കപ്പെട്ട സംഭവമാണ് തലശേരി എസ്.ഐ ഷാജുവിന് വിനയായത്. ഈ വിഷയം ഷാജു കൈകാര്യം ചെയ്തതില്‍ തലശേരിയിലെ പാര്‍ട്ടി നേതൃത്വത്തിന് അതൃപ്തിയുണ്ട്. ഇതേത്തുടര്‍ന്നാണ് എടക്കാട് സ്വദേശിയായ ഷാജുവിനെ സ്ഥലംമാറ്റിയത്.
കഴിഞ്ഞ നിയമസഭാ തെരഞ്ഞെടുപ്പില്‍ കെ.കെ ശൈലജ വിജയിച്ചതിനെ തുടര്‍ന്ന് മിനിലോറിയില്‍ ആളുകളെ കുത്തിനിറച്ച് ആഹ്ലാദപ്രകടനം നടത്തുന്നതു തടഞ്ഞതാണ് കൊളവല്ലൂര്‍ എസ്.ഐ ഷിജുവിന് വിനയായത്. തുടര്‍ന്ന് എസ്.ഐയുടെ കൃത്യനിര്‍വഹണം തടസപ്പെടുത്തിയ രണ്ട് സി.പി. എം പ്രവര്‍ത്തകരെ പിടികൂടിയിരുന്നു. കൊയിലാണ്ടി സ്വദേശിയാണ് ഷിജു.
മുന്‍ ജില്ലാപഞ്ചായത്ത് പ്രസിഡന്റ് പ്രൊഫ.കെ.എ. സരളയുടെ കാര്‍തടഞ്ഞു പിഴ ഈടാക്കിയതാണ് കണ്ണൂര്‍ ട്രാഫിക് എസ്.ഐ സുധാകരനു തിരിച്ചടിയായത്.
മയ്യില്‍ എസ്.ഐയായിരിക്കെ സി.പി.എം പ്രവര്‍ത്തകരെ ലാത്തിചാര്‍ജു ചെയ്തതിനാല്‍ ശത്രുവായ ഉദ്യോഗസ്ഥനാണ് കല്യാടന്‍ സുരേന്ദ്രന്‍. ഭരണമാറ്റം വന്നതോടെ സുരേന്ദ്രന്റെ സ്ഥാനവും ജില്ലയ്ക്കു പുറത്തായി.
ഇവരെകൂടാതെ കണ്ണൂര്‍ ടൗണ്‍ അഡി. എസ്.ഐ പി. എസ് ഉണ്ണികൃഷ്ണനെ തൃശ്ശൂരിലേക്കും ചൊക്ലി എസ്. ഐ ഇ.വി ഷിജുവിനെ കൊച്ചിയിലേക്കും തലശ്ശേരി അഡി. എസ്.ഐ കൃഷ്ണകുമാര്‍, ആറളം എസ്.ഐ കെ.എസ് സുഷാന്ത്, കണ്ണൂര്‍ ടൗണ്‍ എസ്.ഐ വി.പി സിബീഷ് എന്നിവരെ തൃശ്ശൂരിലേക്കും സ്ഥലംമാറ്റിയിട്ടുണ്ട്.