തൃശൂര്‍: കമ്യൂനിസ്റ്റ് നേതാവും സ്വതന്ത്ര്യ സമര സേനാനിയും മുന്‍ എം.എല്‍.എയുമായ എ എം പരമന് വികാരനിര്‍ഭരമായ ചടങ്ങില്‍ വിട നല്‍കി.
തിങ്കളാഴ്ച പുലര്‍ച്ചെ 2.30 ന് അന്തരിച്ച തൃശൂരിന്റെ സ്വന്തം പരമേട്ടന് അന്ത്യാഞ്ജലിയര്‍പ്പിക്കാന്‍ ആയിരങ്ങളാണ് ഒഴുകിയെത്തിയത്. രാവിലെ ആറ് മണിയോടെ പൂങ്കുന്നത്തെ അദ്ദേഹത്തിന്റെ വസതിയിലെത്തിയ സി.പി.ഐ ദേശിയ കണ്‍ട്രോള്‍ കമ്മിഷന്‍ ചെയര്‍മാന്‍ പന്യന്‍ രവീന്ദ്രനും, സി.എന്‍ ജയദേവന്‍ എം.പിയും ചേര്‍ന്ന് മൃതദേഹത്തില്‍ ചെങ്കൊടി പുതപ്പിച്ചു. തുടര്‍ന്ന് ഉച്ചക്ക് 12 മണി വരെ മൃതദേഹം വീട്ടില്‍ പൊതുദര്‍ശനത്തിനു വച്ചു.
12 മണിയോടെ പൊതുദര്‍ശനത്തിനായി സി.പി.ഐ ജില്ലാ കൗണ്‍സില്‍ ഓഫിസായ കെ കെ വാര്യര്‍ സ്മാരക മന്ദിരത്തിലേക്ക് മാറ്റി. ജില്ലാ സെക്രട്ടറി കെ.കെ വത്സരാജ്, സംസ്ഥാന കൗണ്‍സില്‍ അംഗങ്ങളായ അഡ്വ. ടി ആര്‍ രമേഷ്‌കുമാര്‍, പി. ബാലചന്ദ്രന്‍, മന്ത്രി വി.എസ് സുനില്‍കുമാര്‍ എന്നിവര്‍ അനുഗമിച്ചു. സമൂഹത്തിന്റെ നാനാ തുറകളില്‍ നിന്ന് നൂറ് കണക്കിനാളുകള്‍ അന്ത്യാഭിവാദ്യമര്‍പ്പിച്ചു. തുടര്‍ന്ന് പുഴക്കല്‍ ശാന്തിഘട്ടില്‍ വന്‍ജനാവലിയുടെ സാന്നിധ്യത്തില്‍ ഔദ്യോഗിക ബഹുമതികളോടെ സംസ്‌ക്കരിച്ചു.
സി.പി.ഐ ദേശിയ കൗണ്‍സിലിനു വേണ്ടി കണ്‍ട്രോള്‍ കമ്മിഷന്‍ ചെയര്‍മാന്‍ പന്യന്‍ രവീന്ദ്രന്‍, എ.ഐ.ടി.യു.സി ജനറല്‍ സെക്രട്ടറി കെ.പി രാജേന്ദ്രന്‍, ജില്ലാ സെക്രട്ടറി കെ.കെ വത്സരാജ്, എഡിറ്റര്‍ രാജാജി മാത്യു തോമസ്, കെ.ഇ ഇസ്മയില്‍ റീത്ത് സമര്‍പ്പിച്ചു. സി.എന്‍ ജയദേവന്‍ എം.പി, മന്ത്രി വി.എസ് സുനില്‍കുമാര്‍, കെ രാജന്‍ എം.എല്‍.എ എന്നിവരും റീത്ത് സമര്‍പ്പിച്ചു.
മുഖ്യമന്ത്രി പിണറായി വിജയന്‍, മന്ത്രി എ.സി മൊയ്തീന്‍ എന്നിവര്‍ക്ക് വേണ്ടി എ.ഡി.എം ലതിക, കോര്‍പ്പറേഷന് വേണ്ടി ഡെപ്യൂട്ടി മേയര്‍ ബീന മുരളി, സി.പി.എം ജില്ലാ സെക്രട്ടറി കെ രാധാകൃഷ്ണന്‍, പ്രതിപക്ഷ നേതാവ് രമേഷ് ചെന്നിത്തലക്ക് വേണ്ടി യു.ഡി.എഫ് ജില്ലാ ചെയര്‍മാന്‍ ജോസഫ് ചാലിശേരി, സി.എം.പി സംസ്ഥാന ജനറല്‍ സെക്രട്ടറി എം കെ കണ്ണന്‍, ബി.ജെ.പി ജില്ലാ പ്രസിഡന്റ് എ നാഗേഷ്, ടെകസ്‌റ്റൈല്‍ എംപ്ലോയീസ് ഫെഡറേഷനു വേണ്ടി വിജയന്‍ കുനിശേരി, ബി കെ എം യു സംസ്ഥാന പ്രസിഡന്റ് എ കെ ചന്ദ്രന്‍ തുടങ്ങിയയവരും റീത്ത് സമര്‍പ്പിച്ചു.
പി കെ ബിജു എംപി, ജില്ലാ പഞ്ചായത്ത് പ്രസിഡന്റ് മേരി തോമസ്, മുന്‍ മന്ത്രി കെ പി വിശ്വനാഥന്‍, തേറമ്പില്‍ രാമകൃഷ്ണന്‍, മുന്‍ എം.എല്‍.എ മാരായ പി.എ മാധവന്‍, കെ എ ചന്ദ്രന്‍, സി.പി.ഐ കെ.പി സുരേഷ് രാജ്, പി. രാജു, മലപ്പുറം ജില്ലാ സെക്രട്ടറി പി.പി സുനീര്‍, വ്യവസായികളായ പത്മശ്രീ സുന്ദര്‍ മേനോന്‍, പത്മശ്രീ സി കെ മേനോന്‍, ജീവന്‍ ടി വി ഡയറക്ടര്‍ പി ജെ ആന്റണി അന്ത്യാഞ്ജലികള്‍ അര്‍പ്പിച്ചു.