കുറ്റ്യാടി:പുതിയ ബസ് സ്റ്റാന്‍ഡില്‍ ബസ് തൊഴിലാളികളുടെ അനാസ്ഥകാരണം യാത്രക്കാരന് ഗുരുതര പരിക്ക്. ഇന്നലെ കാലത്ത് രണ്ട് ബസുകള്‍ക്കിടയില്‍പ്പെട്ട് കടിയങ്ങാട് സ്വദേശി ഭാസ്‌കര(52)നെയാണ് സാരമായ പരുക്കുകളോടെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചത്. കെ.എസ്.ആര്‍.ടി.സിക്ക് പുതിയ സ്റ്റാന്‍ഡില്‍ ട്രാക്ക് അനുവദിച്ചതിനെതിരെ സ്വകാര്യ ബസുകള്‍ പ്രതിഷേധത്തിലായിരുന്നു. കെ.എസ്.ആര്‍.ടി.സി ബസിനെ ട്രാക്കില്‍ നിര്‍ത്താന്‍ അനുവദിക്കാതെ സ്വകാര്യ ബസ് ജീവനക്കാര്‍ തടസപ്പെടുത്തിയിരുന്നു. കഴിഞ്ഞ കുറച്ചു ദിവസമായി പഞ്ചായത്തിന്റെ തീരുമാനം ലംഘിച്ച് സ്വകാര്യ ബസുകള്‍ അനുവദിച്ച ട്രാക്കില്‍ ബസ് നിര്‍ത്താതെ വടകര, തലശ്ശേരി ഭാഗത്തേക്കുള്ള ബസുകളുടെ ട്രാക്കില്‍ നിര്‍ത്തുക പതിവായിരുന്നു.
ഇന്നലെ തലശേരി യിലേക്ക് ബസ് കയറാന്‍ ശ്രമിക്കുന്നതിനിടയിലാണ് അതേ ട്രാക്കില്‍ നിര്‍ത്തിയ ബസ് പിറകോട്ടെടുത്ത് യാത്രക്കാരന് സാരമായി പരിക്കേറ്റത്. പഞ്ചായത്ത് ഭരണസമിതിയുടെ തീരുമാനം രേഖമൂലം പൊലിസിനെ അറിയിക്കുകയും ചെയ്തിരുന്നു. എന്നാല്‍ പൊലിസിന്റെ ഭാഗത്ത് നിന്ന് വേണ്ടത്ര ഇടപെടല്‍ ഉണ്ടാകാത്തതാണ് അപകടത്തിന് ഇടയാക്കിയതെന്നും ആക്ഷേപം ഉയര്‍ന്നിട്ടുണ്ട്.