ലഖ്‌നൗ:ഉത്തര്‍പ്രദേശിലെ കര്‍ഷകരുടെ കടങ്ങള്‍ എഴുതിത്തള്ളാന്‍ മുഖ്യമന്ത്രി യോഗി ആദിത്യനാഥിന്റെ നേൃത്വത്തിലുള്ള സര്‍ക്കാരിന്റെ പ്രഥമ മന്ത്രിസഭാ യോഗം തീരുമാനിച്ചു. ഒരു ലക്ഷം വരെയുള്ള കാര്‍ഷിക കടങ്ങളാണ് എഴുതിത്തള്ളുക
സംസ്ഥാനത്തെ 2.21 കോടി കര്‍ഷകര്‍ക്ക് ഇതിന്റെ പ്രയോജനം ലഭിക്കും. ഇതിനായി 36,359 കോടി രൂപ സര്‍ക്കാര്‍ നീക്കിവച്ചിട്ടുണ്ട്. യു.പിയില്‍ ആകെയുള്ള 2.30 കോടി കര്‍ഷകരില്‍ 2.15 കോടിയും ചെറുകിട ദരിദ്ര വിഭാഗത്തില്‍പ്പെടുന്നവരാണ്. പ്രകൃതി ദുരന്തങ്ങളില്‍പ്പെട്ട് വിളനാശം സംഭവിച്ച കര്‍ഷകരുടെ 62,000 കോടിയോളം രൂപയുടെ കടമാണ് തിരിച്ചടക്കാനാകാതെ കുടിശികയായിട്ടുള്ളതെന്നാണ് സര്‍ക്കാര്‍ പറയുന്നത്. കടങ്ങള്‍ എഴുതിത്തള്ളുമെന്ന് യു.പിയിലെ തെരഞ്ഞെടുപ്പ് പ്രചാരണത്തില്‍ പ്രധാനമന്ത്രി വാഗ്ദാനം ചെയ്തിരുന്നു.
ഇതിന്റെ തുടര്‍ച്ചയായിട്ടാണ് കാര്‍ഷിക കടങ്ങള്‍ എഴുതിത്തള്ളാന്‍ തീരുമാനിച്ചത്.
കാര്‍ഷിക കടങ്ങള്‍ എഴുതിത്തള്ളുന്ന കാര്യത്തില്‍ സര്‍ക്കാര്‍ പിന്നോക്കം പോയെന്ന് ചൂണ്ടിക്കാട്ടി സമാജ് വാദി പാര്‍ട്ടി കടുത്ത വിമര്‍ശനം ഉന്നയിച്ചിരുന്നു. ഇതിനിടയിലാണ് കടങ്ങള്‍ എഴുതിത്തള്ളിക്കൊണ്ട് സര്‍ക്കാര്‍ പ്രഖ്യാപനം നടത്തിയത്. അതേസമയം ഒരു ലക്ഷം രൂപയുടെ കാര്‍ഷിക കടങ്ങള്‍ എഴുതിത്തള്ളുന്ന നടപടിയെ മുന്‍മുഖ്യമന്ത്രി അഖിലേഷ് യാദവ് വിമര്‍ശിച്ചു. കോടിക്കണക്കിന് വരുന്ന കര്‍ഷകരെ സര്‍ക്കാര്‍ കബളിപ്പിച്ചിരിക്കുകയാണെന്ന് അദ്ദേഹം ആരോപിച്ചു. സര്‍ക്കാരിന്റെ നടപടി ദരിദ്രകര്‍ഷകര്‍ക്ക് ഉപകാരപ്രദമാകില്ലെന്ന് അഖിലേഷ് പറഞ്ഞു.
കര്‍ഷകരുടെ എല്ലാ കടങ്ങളും എഴുതിത്തള്ളുമെന്ന സര്‍ക്കാര്‍ പ്രഖ്യാപനം വലിയപ്രതീക്ഷയോടെയായിരുന്നു നോക്കിക്കണ്ടിരുന്നതെന്നും എന്നാല്‍ അവരുടെ പ്രതീക്ഷ അസ്ഥാനത്താവുകയാണുണ്ടായതെന്ന് കോണ്‍ഗ്രസ് നേതാവ് രണ്‍ദീപ് സിങ് സുര്‍ജേവാല പറഞ്ഞു. വന്‍കിട വ്യവസായികള്‍ക്കും വ്യവസായ ശാലകള്‍ക്കുമുള്ള 140,000 കോടി രൂപയാണ് മോദി സര്‍ക്കാര്‍ എഴുതിത്തള്ളിയിരുന്നത്. എന്നാല്‍ ദരിദ്രകര്‍ഷകരുടെ മുഴുവന്‍ കാര്‍ഷിക കടങ്ങളും എഴുതിത്തള്ളാന്‍ ശ്രമിക്കാത്തത് കടുത്ത വഞ്ചനയാണെന്നും അദ്ദേഹം ആരോപിച്ചു.