ടെഹ്‌റാന്‍: പ്രശസ്ത ഇറാനിയന്‍ ചലച്ചിത്രകാരന്‍ അബ്ബാസ് കിരോസ്തമി അന്തരിച്ചു. ഇറാനിയന്‍ പുതുയുഗ സിനിമയുടെ വക്താവെന്നാണ് അദ്ദേഹം അറിയപ്പെട്ടിരുന്നത്. 76 കാരനായ കിരോസ്തമി അര്‍ബുദ രോഗബാധയെ തുടര്‍ന്ന് ഫ്രാന്‍സിലെ ആശുപത്രിയില്‍ ചികിത്സയിലായിരുന്നു.

തിരക്കഥാകൃത്ത് ഫൊട്ടോഗ്രാഫര്‍, നിര്‍മ്മാതാവ് എന്നീ നിലകളിലും ജനകീയനായ ഇദ്ദേഹം നാല്‍പ്പതിലധികം ചിത്രങ്ങള്‍ ലോക സിനിമയ്ക്ക് സമ്മാനിച്ചിട്ടുണ്ട്. കാന്‍ ചലച്ചിത്രമേളയില്‍ പാം ദി ഓര്‍ പുരസ്‌കാരം നേടിയ 'ടേസ്റ്റ് ഓഫ് ചെറി' ഉള്‍പ്പെടെ പ്രേക്ഷക മനസു കീഴടക്കിയ ഒത്തിരി സിനിമകള്‍ അദ്ദേഹത്തിന്റേതായിട്ടുണ്ട്.

1987 ല്‍ പുറത്തിറങ്ങിയ കിരോസ്തമിയുടെ 'വേര്‍ ഈസ് ദ ഫ്രന്റ്‌സ് ഹോം' എന്ന ചിത്രം ലോക ശ്രദ്ധ നേടി. ഒരു ചിത്രം കാണുന്ന പ്രേക്ഷരുടെ മുഖഭാവങ്ങള്‍ മാത്രം ഉള്‍പ്പെടുത്തിയാണ് ഷിറിന്‍ ഒരുക്കിയത്.ചലച്ചിത്രമേളകളിലൂടെ മലയാളികള്‍ക്കും പ്രിയങ്കരനായിരുന്നു കിരോസ്തമി.