തൊടുപുഴ: സബ് ട്രഷറിയിലെത്തിയ പെന്‍ഷന്‍കാര്‍ക്ക് 'കൈ നിറയെ' പണം. അക്കൗണ്ടില്‍ നിന്ന് 25,000 രൂപ പിന്‍വലിയ്ക്കാന്‍ എത്തിയയാള്‍ക്ക് ലഭിച്ചത് പത്തു രൂപയുടെ കെട്ടുകള്‍. കറന്‍സിക്ഷാമം രൂക്ഷമായതിനാല്‍ വലിയ തുകയുടെ നോട്ടുകള്‍ ബാങ്കില്‍ നിന്ന് ലഭിക്കാത്തതു മൂലം ട്രഷറിയിലെത്തിയ ഇടപാടുകാര്‍ ദിരിതത്തിലായി.
പെന്‍ഷന്‍കാരടക്കമുള്ള ഇടപാടുകാര്‍ നോട്ടുകള്‍ എണ്ണി തളര്‍ന്നു. ട്രഷറി ജീവനക്കാരും ഏറെ ബുദ്ധിമുട്ടി. റിസര്‍വ്ബാങ്ക് കേരളത്തിലെ ബാങ്കുകള്‍ക്ക് കറന്‍സി അനുവദിക്കാത്തതാണ് ട്രഷറികളെയും വലച്ചത്. രണ്ടു ദിവസമായി ഇതു തുടരുകയാണ്. ബാങ്കില്‍ നിന്ന് നേരിട്ടുള്ള പെന്‍ഷന്‍ വിതരണവും പണമില്ലാത്തതിനാല്‍ മുടങ്ങുകയാണ്. ഇടപാടുകാരെല്ലാം വട്ടം ചുറ്റി. കറന്‍സിനിരോധത്തിന്റെ പ്രശ്‌നങ്ങള്‍ തീര്‍ന്നില്ലെന്നതിന്റെ നേര്‍ക്കാഴ്ചയായി ഇടപാടുകാരുടെ ദുരിതങ്ങള്‍.
കഴിഞ്ഞ ദിവസം എസ്.ബി.ഐയില്‍ ലയിച്ച എസ്.ബി.ടി മെയിന്‍ ബ്രാഞ്ചില്‍ നിന്നാണ് തൊടുപുഴ സബ്ട്രഷറിയിലേയ്ക്കുള്ള പണം നല്‍കുന്നത്. എന്നാല്‍ നൂറ്, അഞ്ഞൂറ്, ആയിരം രൂപയുടെ നോട്ടുകള്‍ ബാങ്കില്‍ ലഭ്യമല്ലായിരുന്നു. ഇതുമൂലം ഇന്നലെ പണത്തിന് സമീപിച്ച തൊടുപുഴ സബ്ട്രഷറിക്ക് ചാക്കുകെട്ടുകളിലാക്കി പണം കൊണ്ടുപോവേണ്ടി വന്നു. 10, 20 എന്നിവയുടെ നോട്ടുകള്‍ക്കു പുറമെ പഴകിയ 50 രൂപ നോട്ടുകളുമാണ് നല്‍കിയത്. ജീവനക്കാര്‍ ഓട്ടോയില്‍ കയറ്റിയാണ് നോട്ടുകെട്ടുകള്‍ ട്രഷറിയില്‍ എത്തിച്ചത്. ഇടപാട് തുടങ്ങാനായത് രാവിലെ 11 നു ശേഷമാണ്.
70 ലക്ഷം രൂപയുടെ ഇടപാടാണ് തൊടുപുഴ സബ് ട്രഷറിയില്‍ ഇന്നലെ നടത്തിയത്. ഇതില്‍ 49 ലക്ഷം രൂപയാണ് ബാങ്കില്‍ നിന്ന് ലഭിച്ചത്. ഇതുമുഴുവനും 10, 20 നോട്ടുകളും പഴകിയ 50 രൂപ നോട്ടുകളുമായിരുന്നു.
നോട്ടുകെട്ടുകള്‍ കൊണ്ടുപോകാനുള്ള ബുദ്ധിമുട്ടു മൂലം പലരും പെന്‍ഷന്‍ വാങ്ങുന്നത് അടുത്ത ദിവസത്തേക്ക് മാറ്റി.