തൃക്കരിപ്പൂര്‍: പൊതു വിദ്യാലയത്തിന് കൈത്താങ്ങുമായി ഫ്രഞ്ചുകാരി. വലിയപറമ്പ് ഗ്രാമപഞ്ചായത്തിലെ ഉദിനൂര്‍ കടപ്പുറം ഗവ. ഫിഷറീസ് യു.പി സ്‌കൂളിലെ 87 വിദ്യാര്‍ഥികള്‍ക്കാണ് വരുന്ന ജൂണ്‍ മാസത്തിലെ പ്രവേശനോത്സവത്തിന് മുന്‍പേ അടുത്ത അധ്യയന വര്‍ഷത്തേക്കുള്ള പഠനോപകരണങ്ങള്‍ സ്വന്തമായത്. ഫ്രാന്‍സിലെ അനസി സ്വദേശിനിയായ വെറോണിക് എന്ന സാമൂഹ്യ പ്രവര്‍ത്തകയാണ് അന്‍പതിനായിരത്തോളം രൂപയുടെ പഠനോപകരണങ്ങളായ ബാഗ്, കുട, കാല്‍ക്കുലേറ്റര്‍, നോട്ട് ബുക്ക്, ഇന്‍സ്ട്രുമെന്റ് ബോക്‌സ്, പെന്‍സില്‍, പേന, പൗച്ച് തുടങ്ങിയവ സംഭാവന ചെയ്തത്.
കഴിഞ്ഞ രണ്ടുവര്‍ഷമായി കേരളം സന്ദര്‍ശിക്കാനെത്തിയ ഈ ഫ്രാന്‍സുകാരി ഇത്തവണ ആറാഴ്ചയായി ഇവര്‍ ഉദിനൂര്‍ കടപ്പുറത്ത് ആയുര്‍വേദ ചികിത്സയിലാണ്. മാതൃഭാഷയായ ഫ്രഞ്ചിനോടൊപ്പം ഇംഗ്ലീഷും കൈകാര്യം ചെയ്യാനറിയുന്ന വെറോണിക് കഴിഞ്ഞ സന്ദര്‍ശനം മുതല്‍ അവര്‍ക്ക് ഇംഗ്ലീഷ് ടീച്ചറുടെ സാന്നിധ്യവുമായി. കുട്ടികള്‍ക്ക് ഇംഗ്ലീഷ് നന്നായി കൈകാര്യം ചെയ്യാനുള്ള വഴികാട്ടിയുമായിത്തീര്‍ന്നു. അധ്യാപികയും മന:ശാസ്ത്രജ്ഞയുമായ ഇവര്‍ കേരളത്തിലെ അടുക്കളയിലെ കൊതിയൂറുന്ന വിഭവങ്ങള്‍ ഉള്‍പ്പെടുത്തിയ ഭക്ഷ്യ വിഭവങ്ങളുടെ മേള കൂട്ടുകാര്‍ക്കൊപ്പം നടത്തിയും തന്റെ വീട്ടിലെ സ്വീകരണമുറിയില്‍ പഠനം വഴിമുട്ടിയ കുട്ടികള്‍ക്ക് സാന്ത്വനമാകാന്‍ ഭണ്ഡാരപ്പെട്ടി സ്ഥാപിച്ചും പണം സ്വരൂപിച്ചാണ് സാമൂഹ്യ സേവന രംഗത്ത് സജീവമായിരിക്കുന്നത്. നിരവധി ആഫ്രിക്കന്‍ രാജ്യങ്ങളിലെ രക്ഷിതാക്കളില്ലാത്ത കുഞ്ഞുങ്ങള്‍ക്ക് സഹായങ്ങള്‍ നല്‍കാനും വെറോണിക് തന്റെ ജീവിതത്തെ സമൂഹത്തിന്റെ ഭാഗമാക്കി മാറ്റി സമര്‍പ്പിക്കുന്നു.
വലിയപറമ്പ് ഗ്രാമപഞ്ചായത്ത് പ്രസിഡന്റ് എം.ടി അബ്ദുല്‍ ജബ്ബാര്‍ വെറോണിക്കില്‍ നിന്നും പഠനോപകരണങ്ങള്‍ ഏറ്റുവാങ്ങി കുട്ടികള്‍ക്ക് കൈമാറി. സമഗ്ര ശിക്ഷ കേരളം സംസ്ഥാന കണ്‍സള്‍ട്ടന്റ് ഡോ. പി.കെ ജയരാജ് വെറോണിക്കിന് വിദ്യാലയത്തിന്റെ ഉപഹാര സമര്‍പ്പണം നടത്തി. പി.ടി.എ പ്രസിഡന്റ് വി.പി അഹമ്മദ് കുഞ്ഞി അധ്യക്ഷനായിരുന്നു. പ്രധാന അധ്യാപകന്‍ കെ ദാമോദരന്‍, ചെറുവത്തൂര്‍ ബി.ആര്‍.സി പരിശീലകന്‍ പി വേണുഗോപാലന്‍, ഇ.കെ സിന്ധു, വി മധുസൂദനന്‍, എ.വി ശ്രീമതി, എം.പി സന്തോഷ്, എന്‍.കെ ജയദീപ്, എ അശോകന്‍, ടി.കെ.പി അബ്ദുറഹൂഫ്, കെ ദേവനന്ദ സംസാരിച്ചു.