ശ്രീനഗര്‍: മുതിര്‍ന്ന മാധ്യമപ്രവര്‍ത്തകനും റൈസിംഗ് കശ്മിര്‍ പത്രത്തിന്റെ എഡിറ്ററുമായ ഷുജാത് ബുഖാരി വധത്തില്‍ അക്രമികളെന്ന് സംശയിക്കുന്നവരുടെ സി.സി.ടി.വി ദൃശ്യങ്ങള്‍ പുറത്ത്. ബൈക്കില്‍ മുഖം മറച്ച നിലയില്‍ സഞ്ചരിക്കുന്ന മൂന്നു പേരുടെ ചിത്രങ്ങളാണ് കശ്മിര്‍ പൊലിസ് പുറത്തുവിട്ടത്.
പള്‍സര്‍ ബൈക്കില്‍ സഞ്ചരിക്കുന്ന ഇവരുടെ കൈവശമുള്ള സഞ്ചിയില്‍ മാധ്യമപ്രവര്‍ത്തകനെ വധിക്കാന്‍ ഉപയോഗിച്ച ആയുധങ്ങളാണെന്ന് സംശയമുണ്ട്. അക്രമികളെ കണ്ടെത്താന്‍ പൊതു ജനങ്ങള്‍ സഹായിക്കണമെന്ന് ചിത്രം പുറത്തുവിട്ടുകൊണ്ട് കശ്മിര്‍ പൊലിസ് അഭ്യര്‍ത്ഥിച്ചു.വ്യാഴാഴ്ച്ച രാത്രി ഏഴുമണിയോടെയാണ് ശ്രീനഗറിലെ പ്രസ് കോളനിയില്‍ വച്ച് ബുഖാരിക്ക് വെടിയേറ്റത്. അക്രമികള്‍ ബുഖാരിക്ക് നേരെ നിരവധിതവണ വെടിയുതിര്‍ത്തുവെന്നാണ് റിപ്പോര്‍ട്ട്. ഇദ്ദേഹത്തിന്റെ സുരക്ഷക്കായി നിയോഗിച്ചിരുന്ന രണ്ട് പൊലിസുകാരും ആക്രമണത്തില്‍ കൊല്ലപ്പെട്ടിരുന്നു. നേരത്തെ ബുഖാരിക്കു നേരെ ആക്രമണമുണ്ടായതിനെ തുടര്‍ന്നാണ് പൊലിസ് കാവല്‍ ഏര്‍പ്പെടുത്തിയത്.