ന്യൂഡല്‍ഹി: പാക് സൈന്യത്തിന്റെ പ്രകോപനവും ഇന്ത്യന്‍ സൈന്യത്തിന്റെ തിരിച്ചടിയുമായി അതിര്‍ത്തിയില്‍ ഇന്നലെയും യുദ്ധസമാനമായ അന്തരീക്ഷം. ചൊവ്വാഴ്ച പുലര്‍ച്ചെ പാകിസ്താനില്‍ കയറി ജെയ്‌ഷെ ഭീകരകേന്ദ്രങ്ങളില്‍ മിന്നലാക്രമണത്തിലൂടെ കനത്ത നാശനഷ്ടമുണ്ടാക്കിയ ഇന്ത്യന്‍ വ്യോമസേനാ നടപടിക്ക് പിന്നാലെ കശ്മിര്‍ അതിര്‍ത്തി പ്രദേശങ്ങളില്‍ പ്രത്യാക്രമണം ഉണ്ടാകുമെന്ന മുന്നറിയിപ്പിനെ തുടര്‍ന്ന് സുരക്ഷ ശക്തമാക്കിയിരിക്കുകയാണ്. ഇതിനിടെ ചില പാക് വിമാനങ്ങള്‍ ഇന്ത്യന്‍ അതിര്‍ത്തി കടക്കാന്‍ ശ്രമിച്ചത് വ്യോമസേന തടഞ്ഞു. പാകിസ്താന്റെ എഫ്. 16 പോര്‍വിമാനം ഇന്ത്യന്‍ സൈന്യം വെടിവച്ചിടുകയും ചെയ്തു.
ചൊവ്വാഴ്ച വൈകിട്ട് മുതല്‍ അതിര്‍ത്തിയില്‍ പാക് സൈന്യം ഷെല്ലാക്രമണം നടത്തിയിരുന്നു. ഗ്രാമീണരെ മറയാക്കിയുള്ള ഷെല്ലാക്രമണത്തില്‍ അഞ്ച് സൈനികര്‍ക്ക് പരുക്കേറ്റു. ഇതിനു തിരിച്ചടിയായി ഇന്ത്യന്‍ സൈന്യം അഞ്ച് പാക് സൈനിക പോസ്റ്റുകള്‍ തകര്‍ത്തു. ഒട്ടേറെ പാക് സൈനികര്‍ക്ക് ആക്രമണത്തില്‍ പരുക്കേറ്റതായാണ് വിവരം.
ഷോപ്പിയാനിലെ മീമന്ദറിലുമുണ്ടായ ഏറ്റുമുട്ടലില്‍ രണ്ട് ഭീകരരെ സൈന്യം വധിച്ചു. ബുധനാഴ്ച പുലര്‍ച്ചെ ആരംഭിച്ച ഏറ്റുമുട്ടല്‍ മണിക്കൂറുകളോളം നീണ്ടുനിന്നു. ഏറ്റുമുട്ടലിന് പിന്നാലെ ഷോപ്പിയാനിലും പുല്‍വാമയിലും സൈന്യം വ്യാപക തിരച്ചില്‍ നടത്തി.
മേഖലയില്‍ ശക്തമായ നിരീക്ഷണവും പരിശോധനകളും തുടരുകയാണ്.
സുരക്ഷാപ്രശ്‌നങ്ങള്‍ കണക്കിലെടുത്ത് രജൗറിയിലെ വിദ്യാഭ്യാസസ്ഥാപനങ്ങള്‍ക്ക് ഇന്നലെ അവധി നല്‍കി. ജനങ്ങളുടെ സുരക്ഷ ഉറപ്പുവരുത്താന്‍ സൈന്യം കശ്മിരിലെങ്ങും കനത്ത ജാഗ്രത തുടരുകയാണ്.